Bu jamoalar orasida "Turon" ham bor. Yaypanliklar Side shahrida, shundoqqina dengiz bo'yiga joylashishgan bo'lib, mashg'ulot va o'rtoqlik uchrashuvlarini bilyard stoliga o'xshash ideal maydonda o'tkazishyapti. "Turon" o'tgan yili Superligaga o'tish o'yinida "Lokomotiv"ni mag'lub etib, kuchlilar safiga qaytishdi. Jamoani mavsumlar oralig'ida Sergey Morozov, Siyovush Habibulloev, SHarifbek Rahmatov, Sardor Telyakov, Sardor Abdunabiev, Nizomiddin Ziyovutdinov, Mirzohid Mirzamahmudov, Doniyor Ismoilov va Akmal Tursunboev tark etdi. Aksincha, Azim Ahmedov, Rahimjon Davronov (ikkisi ham "Navbahor"), SHohnazar Norbekov, Quvondiq Ro'ziev (ikkisi ham "Qo'qon-1912"), Anri CHichinadze ("Dila" Gruziya), Dostonbek To'xtaboev ("Mashal"), Xurshid Muxtorov ("Lokomotiv"), Xumoyunshoh Sayyotov ("Metallurg") va serbiyalik legioner Dushan Stoilkovich Baxtiyor Ashurmatov jamoasiga kelib qo'shildi.
Anglaganingizdek, Antaliyadagi navbatdagi safarimiz aynan "Turon" joylashgan Sidega bo'ldi. Mehmonxonamizdan 40 km uzoqlikda joylashgan bu erga ijaraga olgan ulovimiz bir zumda etkazdi. Kelganimizga besh kun bo'ldi va shu kungacha faqat bir joyda yo'l patrul xodimlarini ko'rdik. U ham bo'lsa, mast holatdagi ruslar boshqarayotgan mashinani "shatak"ka olishdi. Qolgan holatlarda yo'llarda osuda, bir maromdagi hayotga guvoh bo'lyapmiz.
Biroz mavzudan uzoqlashdik. Buning uchun bizni manzur tutgaysiz. Quyida "Turon"ning yangi futbolchisi Azim Ahmedov bilan uyushtirgan suhbatimizni havola qilamiz. Tajribali yarim himoyachi o'tgan mavsumni "Navbahor" jamoasida o'tkazgan edi. Etarli o'yin amaliyotiga ega bo'lmagan Ahmedov Namangan klubini tark etishga qaror qildi.
- Azimjon, o'tgan mavsumni "Navbahor"da o'tkazdingiz. Bu yil ham "lochinlar" safida qolishingiz mumkinmidi? Yoki pichoq suyakka taqalganmidi?
- Menimcha, vaziyat shunga etib kelgandi. O'yin amaliyoti juda kam bo'ldi. Menga ishonch bildirilmadi. Keyin kelishmovchiliklar ham bo'ldi. SHularning barini inobatga olib, ketishga qaror qildim. Bu orada "Turon"dan taklif bo'ldi va men hozir yangi jamoam bilan birga yangi mavsumga tayyorgarlik ko'ryapman.
- Kelishmovchiliklar bosh murabbiy bilan bo'ldimi?
- Ha, xuddi shunday. O'yinga qo'ymayapti, gapirmayaptiyam. Bu narsalar menga psixologik zarba bo'ldi. SHuning uchun ham ketishga qaror qildim. Ular ham bunga qarshi bo'lishmadi. Agar kerak bo'lganimda olib qolish uchun kurashishardi-ku.
- "Navbahor" bilan o'rtada qarzdorlik yo'qmi? Hisob-kitob to'liq amalga oshirildimi?
- Endi ozgina qolib ketdi.
- Berishar ekanmi?
- Menimcha, berishsa kerak.
- Berish shart. Qarz qiyomatga qolmasligi lozim. Bu birgina sizning holatingizda emas, barcha klub va futbolchi oldi-berdilariga tegishli. Endi yangi klubingiz haqida gaplashsak. Jamoaga moslashib ketishingiz qiyin bo'lmayaptimi?
- Aslo yo'q. Klub rahbariyati kutib olishdan tortib, to eng mayda dettalarigacha etibor qaratgan. Bir so'z bilan aytganda hammasi ajoyib. Futbolchilar bilan birga murabbiylarimizning yuzini erga qaratmaslik uchun astoydil harakat qilamiz. Ajoyib sharoitlarda yangi mavsumga tayyorgarlik ko'ryapmiz. Ideal maydon, o'rtoqlik uchrashuvlaridagi kuchli raqiblar mavsumga yaxshi tayyorgarlik ko'rishimiz uchun xizmat qilmoqda.
- "Turon"ga o'tishingizni akangiz Odil Ahmedov bilan maslahatlashdingizmi?
- Albatta. Odil akam endi otam o'rnida ota. Hammasi yaxshilikka deb maslahat berishdi.
- Ko'pchilikning fikricha, yangi mavsumda yana "Paxtakor" va "Navbahor" jamoalari chempionlik uchun kurash olib boradi. Siz ikkala klub tarkibida ham o'ynashga ulgurdingiz. Hozirgi holatdan kelib chiqib, qaysi klubning imkoniyatlarini yuqoriroq baholaysiz?
- O'tgan yili hamma jamoalar ham kurashishdi. Siz aytgan klublarning kutilmagan natijalari fikrimga isbot bo'lsa kerak. Bu yil ham murosasiz mavsumga guvoh bo'lamiz deb ayta olaman. Biz ham qarab turmaymiz, hech kimga shunchaki ochko berib yubormaymiz.
- "Navbahor" qaysidir manoda og'zidagi oshini oldirib qo'ydi. Hammasi o'z qo'lida edi. Jamoaga nima bo'ldi?
- SHu savol meni ham qiynaydi. Nimadirlarga o'zgartirish kerakmidi? Endi bu murabbiy qarori. Omad ham etishmadi. "Metallurg", "Olimpik" klublariga qarshi kechgan uchrashuvlarda qimmatli ochkolarni boy berdik. Ayniqsa, o'z uyimizdagi duranglar bizga qimmatga tushdi.
Kamoliddin ALIMOV suhbatlashdi (Antaliya, Turkiya)
Bosh sahifaga
245