Superliganing birinchi turidan o'rin olgan "Paxtakor"ga qarshi uchrashuvdan so'ng Jasur Jaloliddinovga bir nechta savollar bilan yuzlandik.
- O'yin haqida...
- Birinchi o'yin "Paxtakor" bilan kechdi. Amaldagi chempionga qarshi qiyin bahs bo'ldi. Qura tashlash marosimidan keyin Antaliyadayoq tayyorgarlikni boshlagandik. Ularning yig'inlardagi o'yinlari orqali o'rgandik. Bu mavsumda biz qaysidir taraflama kuchaydik ham, deya olaman. Boshqa tomonidan bizga qiyin bo'lishi aniq. CHunki endi yosh jamoa, deb o'ylashmaydi. Mana, "Paxtakor" ham jangovar ruhda maydonga chiqdi. Lekin biz hamma narsaga tayyor edik. Murabbiyimizning ko'rsatmalarini bajarib maqsadimizga erishdik. Umumiy qilib aytganda mavsumni muhim g'alaba bilan boshladik.
- Bundan buyon "Olimpik"ni yosh deyishda davom etish qanchalik to'g'ri bo'ladi?
- O'ylashimcha, bizni endi hech kim yosh demaydi. Qaytanga yanada jiddiy qarashsa kerak. Biz ham yoshmiz, deb o'tirmayapmiz. Ishlayapmiz.
- "Olimpik"dagi raqamingiz haqida...
- Messi 30-raqamni olgani uchun menda ham shunday imkoniyat bo'ldi. Klubda 30, terma jamoada 10-raqamda to'p tepaman.
- "Olimpik"dagi rejalaringiz qanday?
- Agar yozda yaxshi taklif tushsa, ketsam kerak, deb o'ylayman. Lekin birinchi davradan keyin chempionlik uchun kurashadigan o'rinlarda bo'lsak, ketaman.
- "Lokomotiv"da tajribali futbolchilar bilan o'ynagansiz. "Olimpik"da esa tengqurlaringiz bilansiz. Bu sizga erkinlik va o'zingizni ko'rsatish imkonini beradimi?
- "Olimpik" ochilganidan beri menda shunday imkoniyat bo'gan. Bilaman, bu erga kelsam terma jamoada bo'lgani kabi o'zimni yaxshi his qilaman. Faqat moliyaviy tomondan yutqazardim. Olimpiyadaga yo'llanma beruvchi Osiyo kubogiga bir yil qoldi. Hozir pul va boshqa narsalardan kechishning vaqti. Timur Kapadzening yonida shug'ullanib, yanada yaxshi tayyorgarlik ko'raman. Ochig'i muxlislarda ham men haqimda pul uchun o'ynaydi, degan shubha bor edi. "Olimpik"ka kelish uchun ko'p narsadan kechdim.
Bosh sahifaga
183