Toshkentda bo'lib o'tayotgan U-20 Osiyo kubogining final bahsidan oldin tashkil etilgan matbuot anjumanida termamiz ustozi Ravshan Haydarov va sardori Umarali Rahmonaliev ishtirok etdi.
Ertangi o'yin haqida:
Barchaga assalomu alaykum. Avvalambor finalga qadar etib kelishimizda bizni qo'llab-quvvatlab turgan xalqimiz va muxlislarga minnatdorchilik bildiraman. Ertaga bizni muhim o'yin kutib turibdi. Mazkur uchrashuvga reja bo'yicha tayyorgarlik olib bordik, ertaga o'zimizning o'yinimizni namoyish etib, musobaqa g'olibligini qo'lga kiritmoqchimiz.
Tajriba va uning ahamiyati haqida:
Ha, men va murabbiylar shtabim bu kabi musobaqalar hamda final uchrashuvlarida avval ham ishtirok etganmiz. Bu tajriba bizga yordam beradi, buni futbolchilarga ham singdirib borishga harakat qilyapmiz. Biroq bilasiz, ertangi final boshqa tarix va biz unga masuliyat bilan tayyorgarlik ko'ryapmiz.
Biz o'tgan o'yinlar davomida juda ko'p kuch va emociya yo'qotdik. Hozirda tiklanish jarayonini davom ettirgan holda etiborimizni faqat o'yinga qaratganmiz.
Muxlislar va o'yin uslubi haqida:
Albatta, ular bizga qo'shimcha kuch bag'ishlamoqda. Biz ular bilan yanada kuchlimiz. Ertangi o'yinda ham ularni xursand qilishni niyat qilganmiz.
Hozirda jismoniy va teoretik tayyorgarlikni davom ettiryapmiz. Finalga jismoniy va ruhiy yaxshi holatda etib borish muhim hisoblanadi. Tarkibga kelsak, kim tayyor bo'lsa, o'sha maydonga tushadi.
Hujum chizig'i haqida:
Futbolda gol kiritish eng muhim narsa va bu o'ziga yarasha qiyin hisoblanadi. Ha, biz Avstraliya va Koreyaga qarshi o'yinlarda ko'plab vaziyatlar yaratdik, biroq ularni golga aylantirishda muammolar bo'ldi.
Yakuniy nuqtani qo'yishda kamchiliklarimiz bor. Lekin oldimizda Jahon chempionatiga qadar vaqt bor. Barcha vaziyatlarni hali ko'rib chiqamiz va tahlil qilamiz. Bu yo'nalishda albatta o'z ustimizda ishlaymiz.
Jamoaning jismoniy holati haqida:
O'tgan o'yinlar shuni ko'rsatdiki, biz bu yo'nalishda to'g'ri yo'ldamiz. Murabbiylar shtabi jismoniy tayyorgarlik bo'yicha yaxshi ishlashmoqda. Aytganimdek, biz kuch yo'qotdik, biroq tiklanish jarayoni tezkorlik bilan boshlangan va hozir ham davom etmoqda. Ertaga bizga muxlislaning qo'llab-quvvatlashi, ishtiyoq va masuliyat albatta yordam beradi.
Raqib futbolchilari haqida:
Men aynan qaysidir bir futbolchini alohida ko'rsatmoqchi emasman. Ular jamoaviy yaxshi harakat qiladilar. Va biz ham rejani shunga yarasha qilamiz. Aynan bir futbolchiga qarshi emas, jamoaga qarshi tayyorgarlik va reja tuzamiz.
Umarali Rahmonaliev
Final haqida:
Assalomu alaykum. Butun xalqimiz, muxlislar kutgan hal qiluvchi o'yinga ham oz qoldi. Biz bu musobaqaga uzoq muddat davomida tayyorgarlik olib bordik. Ertaga katta masuliyat va ishtiyoq bilan maydonga tushgan holda borimizni berib harakat qilamiz.
Butun xalqimiz bizdan chempionlikni kutmoqda. Xudo xohlasa, uzoq kutilgan chempionlikni qo'lga kiritamiz.
120 daqiqadan iborat 2 ta uchrashuvdan so'ng jamoaning jismoniy holati haqida:
Biz ko'p kuch yo'qotdik. Lekin mutaxassislar tiklanish uchun harakatni o'yin tugashi bilanoq boshlab yuborishdi. Ular doim “orqada” ko'rinmasligi mumkin. Lekin ularning say-harakatlari bilan biz jismoniy jihatdan o'yinlarga tayyorgarlik ko'ryapmiz.
Raqib haqida:
Iroq kuchli jamoa. Ularning bir nechta chiziqlarida yaxshi futbolchilar bor. O'yindan o'yinga ochilib bormoqdalar. Murabbiyimiz aytganidek, biz finalda boshqa Iroqni ko'ramiz.
Stadiondagi atmosfera:
Juda ajoyib. Muxlislar bizni qo'llab-quvvatlamoqdalar. Biz buni tushungan va his qilgan holda ertangi o'yinda maydonda borimizni berib harakat qilamiz.
Bosh sahifaga
274