O'shanda o'yin va uning atrofidagi voqeliklar bir oydan ko'proq muddat keskin muhokamalarga sabab bo'lgan, ijtimoiy tarmoqlar bu haqda katta rezonans bergandi. Oradan yillar o'tdi, shundan buyon qanchadan qancha suvlar oqib ketdi va barchasi tarixga aylandi. Bugungi "Paxtakor" va hozirgi "Navbahor" o'rtasida azaliy principiallik bor bo'lsa-da, endilikda o'yin davomida nima yuz bergan bo'lsa ham, barchasi o'sha maydonning o'zida qoladigan bosqichga etib keldi.
Yutqazgan hech qanday etirozlarsiz mard bo'lib maydonni tark etyapti. Bu – professionallik. Alohida kuzatuv olib bordim, ijtimoiy tarmoqlarda kichik gap-so'zlardan tashqari etiborga molik biror norozilik kayfiyati ko'rinmayapti.
Barchasini Sayfiev hal qilgan bo'lsa, demak “Sayfievnamo" o'yin bo'ladi. Farruh uchrashuvning 2-daqiqasidayoq qanotdan uzatib berilgan to'pni aniq zarba bilan O'tkir Yusupov qo'riqlayotgan darvozaga joylab qo'ydi. Odatda bu kabi darajasi yuqori o'yinlarning ilk daqiqalarida aksariyat futbolchilar bunaqa imkoniyatlardan unumli foydalana olishmaydi. CHunki principiallik katta sahnaga chiqqan vaqtda o'yingacha bo'lgan muhit maydondagi o'yinga moslashib olgunga qadar ko'pchilikni dovdiratib qo'yadi. Biroq Sayfiev bu vaziyatda o'ta sovuqqonlik bilan harakat qilib, yuzaga kelgan imkoniyatni aniq zarba bilan golga aylantirdi - 1:0.
Birinchi bo'limning 23-daqiqasida Temurxo'ja Abduxoliqov penaltidan hisobni tenglashtirdi – 1:1.
Uchrashuvning 68-daqiqasida yana o'sha Farruh Sayfievning uzatmasidan so'ng Dragan CHeran mavsumdagi ilk golini urdi – 2:1.
90+4 daqiqada "Navbahor"ning serbiyalik legioneri Yovan Jokich jamoasiga navbatdagi ochkoni taqdim etishi mumkin edi, biroq uning penaltidan yo'llagan zarbasini "Paxtakor" posboni qaytarishning uddasidan chiqdi. Yakuniy hisob – 2:1, "Paxtakor" mavsumdagi ilk g'alabasini aynan azaliy raqibiga qarshi o'yinda qo'lga kiritdi.
Davron Hoshimov maydonda maksimal borini berib o'ynaydi. Odatda u bu borada o'zini ham, raqibini ham ayab o'tirmaydi, shu bois sariq va qizil kartochkalar doim bu futbolchining ortidan ergashib yuradi. Balki boshqa futbolchi chetlatilganida, alohida etiborga molik vaziyat bo'lishi mumkin edi. Biroq Hoshimov tabiatan shunaqa futbolchi, o'yin haroratiga qolgan barcha jarayonni unutgan xolda jiddiy kirishib ketadi. Butun vujudi, bor diqqat-etibori faqat va faqat maydonda bo'ladi.
Penaltilar borasidagi fikrlar har kimda har xil va turlicha yangrayapti. Kimdir bor deydi, kimdir yo'q deyapti, bunaqangi bahs-munozaralar futbolning ajralmas qismi. Balki rakurslar aldayotgandir, ammo har ikki xolatda ham bir qarashda 100 foizlik penalti bor edi deb aytish qiyin. Obdon sinchiklab, stop-kadrlarni qayta-qayta ko'rib chiqqaningizdan keyingina 11 metrlik jarima zarbalariga sabab bo'lgan asoslarni topasiz.
P.S. Muxlislarning Azmiddinovga nisbatan amalga oshirgan harakatlarini hech qachon oqlab bo'lmaydi. SHuningdek, futbolchining ularga javobi ham mutlaqo noto'g'ri. Go'yo bu o'yinda baribir nimadir yuz berishi kerak edi, xuddi shu voqelik negizida sodir bo'ldi.
Qiziq statistika, kechagi "Olimpik" – OKMK uchrashuvi davomida darvoza tomon bor-yo'g'i 2 ta aniq zarba berilibdi.
Bekzod Tolibov
Bosh sahifaga
200