"Olimpiya", "Nurafshon", "Jizzax", "Jayxun" jamoalari O'zbekiston kubogi saralash bahslari orqali yo'lga otlanishdi. Birinchi liga musobaqasi esa aprel oyida start oladi. Klublarning PFL ro'yxatidan o'tkazgan qaydnomalariga nazar solar ekanmiz, bir qator tajribali va nomdor futbolchilarga ko'zimiz tushdi. Quyida shu haqida batafsil to'xtalamiz.
Sanjar Rashidov - "Jizzax"
Rashidovlarning Sardordan keyingi vakili Sanjarni barcha "So'g'diyona"dagi o'yinlari bilan tanigan. Yarim himoyachini 2021 yil "Bunyodkor"dagi faoliyatidan so'ng uni ko'zdan qochirib qo'ygandik. Qishda esa "Surxon" yig'inida qatnashayotganligi malum bo'ldi. Aftidan termizliklar bilan kelishuv amalga oshmadi chog'i yakunda Birinchi liga vakili "Jizzax"dan qo'nim topdi. U yana avvalgi formasiga qaytib ajoyib o'yinlarini ko'rsatishiga tilakdoshmiz. Malumot uchun, endilikda Sanjar Rashidov jamoasi bilan O'zbekiston kubogi guruh bosqichida ishtirok etadi. Saralashdan muvaffaqiyatli o'tgan klub "A" guruhida OKMK, "Andijon-SGS", "G'ijduvon" bilan bellashadi.
Suhrob Nematov - "Nurafshon"
Men bu futbolchini, o'yin uslubini BAA terma jamoasi sobiq yarim himoyachisi Ismoil Matarga o'xshatardim. "Buxoro"da o'ynab yurgan kezlarida jamoaning sardori va haqiqiy etakchisi bo'lgan. Maydonda kurashlardan qochmagan. So'nggi mavsumlarda u Pro ligada "Buxoro"ga ko'maklashishga harakat qildi. Endilikda "Nurafshon" Nematovning tajribasidan foydalanib ko'radi. Futbolchi so'nggi bor 2020 yil "Buxoro" safida Superligada o'ynagan edi.
Sardor Sulaymonov - "Nurafshon"
Sardor Sulaymonovni namanganlik muxlislar juda yaxshi tanishlari aniq. 2018 yil "Navbahor"dagi faoliyatida yomon taassurot qoldirmagandi. Keyinchalik "Andijon", "Buxoro", "Surxon"da to'p tepdi. Superligada doimiy tarzda o'ynab kelayotgan Sardor Sulaymonov Qirg'iz Respublikasining "Neftchi", Buxoroning "G'ijduvon" klublarida to'p tepdi. U ham Suhrob Nematov bilan "Nurafshon" safini to'ldirdi.
Qahramon Bahodirov - "Jizzax"
Yana bir Superliga havosini ko'rgan yarim himoyachining ham faoliyati zinama-zina pastki ligalarga qarab ketmoqda. Qahramon Bahodirov Superligada "Andijon", OKMK, "Mashal", "Buxoro" jamoalarida harakat qilgan. O'tgan yili Pro ligada "Yangier"da o'ynadi. 34 yoshli futbolchi bu mavsumni Birinchi ligada "Jizzax"da o'tkazadi.
Bundan tashqari "Cementchi" ham tarkibni Hamidullo Abduhamidov, SHodiyor Xojimatov, Mirjamol Nematov, Islombek Karimov kabi futbolchilar bilan kuchaytira oldi. "CHig'atoy" safida o'z vaqtida Sergey Lushchanning "Bunyodkor"dagi "qaldirg'ochi" bo'lgan Davronbek Umirov ro'yxatdan o'tgan. Futbolchi "Bunyodkor"dan tashqari elitada "Turon", "Lokomotiv", "Metallurg", "So'g'diyona" jamoalarining liboslarida maydonga tushgan.
"Qumqo'rg'on"da esa "Nasaf" va "SHo'rtan"dagi o'yinlari orqali tanish Laziz Ubaydullaev ham borligini ko'rishimiz mumkin. U 2022 yilda ham shu jamoa sharafini himoya qilgan. Quyi ligalarda ham shunday nomlarning borligi yaxshi holat. Bu birinchidan futbol jamoatchiligining etiborini jalb qilsa, ikkinchidan raqobatning oshishiga xizmat qiladi.
Bosh sahifaga
259