Rasman: "Metallurg" ispaniyalik murabbiy bilan shartnomani bekor qildi
SHu vaqtgacha jamoani boshqarib kelgan ispaniyalik Luisma Ernandes klub bilan xayrlashishga qaror qildi. Mazkur vaziyatga oydinlik kiritish va yangi murabbiy borasida "Metallurg" bosh direktori SHavkat Saidovga murojaat qildik.
- Luis Ernandesning "Metallurg"dan ketishida dastlabki uchta turdagi natijalar bosh omil bo'ldimi? Umuman bu jarayon qanday yuz berdi?
- Murabbiy bilan xayrlashish uchta turdagi natijalarga bog'liq emas. "Paxtakor" bilan o'yinga tayyorgarlik jarayonida, dam olish kuni belgilandi. Ertasi kuni Luisma tomonidan oilaviy sabablarga ko'ra shartnomani bekor qilish haqida murojaat bo'ldi. Rahbariyat bilan o'rganib chiqqan holda do'stona xayrlashuvga kelishildi. Kecha Luisma Bekobodga keldi va jamoa bilan uchrashib, iliq tark etdi. Natijalar asosiy omil bo'lmasligi aniq edi.
- Klub ispaniyalik mutaxassisning ishidan qanchalik qoniqish hosil qildi?
- Barcha biladi futbolda g'alaba va mag'lubiyat birga yuradi. Luisma bilan ajoyib g'alabalar, alamli mag'lubiyatlar ham yuz berdi. Evropalik murabbiydan o'zimizning mahalliy mutaxassislar kerakli tajribani oldi, deya olaman. Tashkiliy ishlar, taktik masalalarda o'ziga yarasha bilimga ega mutaxassis. Luisma bilan hamkorligimizni klub rahbari sifatida qoniqarli, deb o'ylayman.
- Jamoani keyingi murabbiyi kim bo'ladi? Murabbiy tanlashda qaysi faktorlarga tayaniladi?
- Bugun erta yangi murabbiy masalasiga aniqlik kiritiladi. Xorijlik mutaxassis kelish imkoniyati ko'proq. Faktorlarga kelsak, ahamiyat bergan bo'lsangiz Rustam Mirsodiqov davrida "Metallurg" o'z o'rniga ega bo'ldi. Barqaror jamoaga aylandi. Keyinchalik Andrey SHipilov, Jasur Abduraimov, Luisma Ernandes bilan ishladik. Uchala murabbiyimiz ham terma jamoalarda, klublarda murabbiy, assistent sifatida ishlab kelishgan. Yaqqol biron klubda bosh murabbiy bo'lishmagandi. "Metallurg"da ularga shunday imkoniyat berildi. Yangi murabbiyning jamoani barqaror olib yurishi uchun tajribasi bo'lishi kerak, degan fikrga keldik. Psixologik yondashuvga ko'proq etibor berishimiz lozim. SHu narsalarga tayanamiz.
- Demak asosiy favorit xorijlik?
- Yuqorida aytganimdek, xorijlik mutaxassis nomzodi ustun.
- "Metallurg" oldiga aniq vazifa qo'yilganmi? Superligada qanday ishtirok etishni maqsad qilgan?
- Bilasiz, "Metallurg" azaldan "chaqilmas yong'oq" bo'lib kelgan. Ko'p jamoalarga bosh og'riq bo'ladi. Ishonch bilan ayta olaman, "Metallurg" 2017 yildan hozirgi kungacha jadal rivojlanmoqda. Yaratilgan sharoitlar, akademiya, infratuzilma, tashkiliy ishlar bo'yicha top 3talikka kiramiz, desam adashmagan bo'laman. "Metallurg"ga faqat yaxshi o'rinlar yarashadi. Moliyaviy tomondan katta bo'lmasa ham bironta xodimimiz, murabbiyimiz tomonidan bu borada shikoyat bo'lmagan. O'zbekistondagi eng yaxshi akademiyaga egamiz. Bu ham o'z-o'zidan bo'lib qolgani yo'q. Kelajakda iqtisodiy tomonlama baquvvat bo'lsak, yanada yuksak marralarni oldimizga qo'yishimizga ishonaman. Strategiyamiz bor. "Metallurg" professional klubining statusini, nufuzini ko'tarishimiz zarur.
Bosh sahifaga
303