"Navbahor" kuchayganmi yoki raqiblar kuchsizlangan? Babayan 2ta imtixonni 0ga topshirdi

Samvel Babayan 2ta muhim imtixondan o'ta olmadi 

Darhaqiqat, Samvel Babayan chempionlik uchun bu yil o'z falsafasi va o'yin principlaridan voz kechmoqda. Deylik "Navbahor" o'tgan yillarda Babayan boshqaruvida asosan bitta gol yoki 1:0, 2:1, 1:1 kabi kichik hisoblarda natijani qo'lga kiritayotgandi. Bu yil nisbatan hujumkorlikka katta urg'u qaratyapti, oldingi chiziq vakillari asosiy planga chiqmoqda.  Jamoa hozirgacha 5ta turning 3tasida 3:0 hisobida g'alaba qozondi va 9 ochko jamg'ardi. O'tgan mavsumda faqat bitta o'yindagina raqib darvozasiga 3ta to'p kiritgan edi (OKMK 3:1).  SHunday fikrlayapmanku, chuchvarani hom sanaganimni anglayapman. Bu erda raqiblarning darajasini ham hisobga olish zarur. "Metallurg", "So'g'diyona", "Qizilqum" bu yil yaxshigina kuchsizlandi. "Navbahor" ilk turlarda shundan foydalanib qoldi, xolos. Samvel Babayan gvardiyasi kuchli raqiblardan faqat "Paxtakor"  va OKMK bilan o'ynadi va ikkisida ham bir xil 1:2 hisobida mag'lubiyatga uchradi. 9 ochko ham ochko, lekin chempionlikni maqsad qilgan jamoa asosiy raqobatchilarini yutmas ekan, 1996 yilgi xotiralar bilan yashashga majbur bo'ladi. Taqqoslaydigan bo'lsak, jamoa o'tgan yili 26ta turda 3ta mag'lubiyatga uchragan, yakunda 1 ochko etmay qolgandi. Ayni paytda esa 5ta turda 2 bor 3 ochkoni qo'ldan boy berdi va ikkisi ham raqobatchilardan. 

Keyingi uchrashuvlar

Taqvim "Navbahor"ga buyog'iga nisbatan engil raqiblarni taqdim qilmoqda. 14 aprel kuni Namanganda "Andijon"ni qabul qilsa, oradagi kubok bahslaridan so'ng Yaypanga "Turon" maydoniga safar qiladi. Oyning so'nggida o'z maydonida "Buxoro"ni qabul qiladi. Kimga qanday bilmadim, shaxsan men bu bahslarda "Navbahor" xotirjam g'alaba qozonadi, deb ayta olaman.