Muxlis har doim haq bo'lgan, bo'ladi ham. Farg'onadagi stadionda ushbu mavsum Superliganing ikki klubi - "Neftchi" va "Andijon" o'ynayapti. CHipta sotib olib stadionga kirish muammosi asosan o'yin boshlanishiga bir soat vaqt qolganida yuzaga keladi. Ayni shu paytda stadionga muxlislar oqimining eng tig'iz vaqti bo'ladi. Kirish eshiklari yonida kassalar bor, chipta sotuvi muntazam davom etadi. Ammo, yuqorida aytilganidek, bu kassalar birdaniga barchani chipta bilan taminlay olmaydi, metan zapravkalardagi kabi navbatlar yuzaga keladi. Bu bor muammo, inkor qilib bo'lmaydigan aksioma kabi.
Muammo bor bo'lsa, uning echimi ham bo'ladi. Buning jiddiy yondashuvga asoslangan harakat zarur. "Istiqlol" stadioni bu borada ishlamayapti emas, ishlayapti. Masalan, stadionga yaqin bo'lgan yondosh tuman va shaharlar markazlarida, shuningdek Farg'ona shahar dehqon bozorida chiptalar savdosi bilan shug'ullanuvchi maxsus kassalar faoliyati yo'lga qo'yildi. SHuningdek, "Andijon" - "Neftchi" uchrashuvi uchun telegram bot orqali chiptalarning onlayn savdosi test rejimda amalga oshirildi. Onlayn chipta sotib olish ochig'ini aytganda, bizda hali juda ham ommalashib ketmadi. Balki kassaning o'zidan chipta sotib olishga o'rganib qolganmiz, yoki buning ham alohida gashti bor.
"Neftchi"ning Superligada ijobiy natija qayd etayotgani sabab uy o'yinlarida muxlislarning "Istiqlol"ga tashrifi yanada ortib boraveradi. Muammoning yana bir echimi, chipta sotib olish sal ertaroq harakat qiling, masalan bir kun avval. Klubning rasmiy sahifalarida maxsus kassalar joylashgan nuqtalar ko'rsatilgan. Yoki "Istiqlol"ning o'zida ham kassalar muntazam ishlab turadi. Kelasiz va hech qanday navbatsiz chipta xarid qilaverasiz. Yoki endilikda telegram-bot orqali yo'lga qo'yilgan chiptalarning onlayn sotuvi orqali ham xarid qilsangiz bo'ladi, buning uchun uydan chiqishingiz vp qayoqqadir borishingiz shart emas.
Sarlavhada "Nolaga qarshi nola" degan jumla ham bor, to'g'rimi? Hozir muxlis nolasiga qarshi stadion xodimlari ham nola qilishayapti. To'g'risi, bu o'rinda har ikki tomon haq birdek haq. Biri o'yin tomosha qilish uchun stadionga keladi va chipta uchun navbatga duch keladi. Ikkinchi tomon esa, muxlislarni hech bir muammosiz chipta xarid qilishlari uchun barcha harakatni amalga oshiradi, biroq bundan hech kim minnatdor bo'lmaydi.
Aslida o'sha gap to'g'ri, "Muxlis nolasi" orqali olib chiqilgan xolat bu - eng yoqimli muammo. CHunki, siz yaxshi bilasiz, ayrim jamoalar stadionga kirish tekin qilib ham o'yinga muxlis jalb eta olmaydi.
Bekzod Tolibov
Bosh sahifaga
208