«Bunyodkor» — «Nasaf» uchrashuvini televizorda tomosha qildim. Stadionda emasdim va o'yin tugashi bilan televizorni o'chirdim. O'yindan keyingi mashmashalarni ancha vaqt o'tib bildim, videolarni tomosha qildim.
O'yin haqida aytishim mumkin bo'lgan narsa shuki, «Nasaf» kuchli o'ynadi. Suhrob Sultonov bo'lmaganida katta ehtimol ishonchli g'alaba bilan ketardi. Lekin «Nasaf» o'yindagi ushbu ustunligini hisobda aks ettira olmadi va natijada durang.
Hakamlik bo'yicha ortiqcha savollarga hojat yo'q menda. Penalti berilgan vaziyatda «Nasaf» foyda ko'rdi, zarar emas. Qizil kartochka esa oppoq qordek top-toza. Hakam o'yin natijasiga tasir qiladigan qo'pol xato qilgani yo'q.
Davron Ergashevning quvonchi provakacion chiqqani bor gap. Lekin bu uning qarori, u golni yoki qo'lga kiritilgan 1 ochkoni shunday nishonladi. Nishonlash vaqtida aniq bir haqoratomuz harakatni ko'rmadim. Agarda biror videoda aniq bir kamsitish yoki haqoratomuz harakat bo'lgan bo'lsa, unda unga tartib-intizom qo'mitasi tegishli jazolarni beradi. Muammo yo'q. Bu futbol va unda bu kabi emociyalar normal, xattoki kerakli holat. SHu uchun futbolni yaxshi ko'ramiz.
Lekin vaziyat ommaviy mushtlashuv, janjallargacha borgani va bunga Ergashevni gol quvonchidagi holatini sabab keltirish noto'g'ri.
Muammo boshqa tarafda.
«Bunyodkor» tartibli, hech kim bilan ortiqcha konfliktga bormaydigan yoqimtoy jamoa. Uning aybi oxirgi daqiqalarda o'z uyida yana raqibga gol urib, xursandchilik qilganimi? Istaganicha quvonishi mumkin va buni qoidadan chetga chiqmagan holda nishonlashga haqli.
Yutsak biz zo'r, yutolmasak hakamdan ayb izlash yoki chidolmay raqibni xursandchiligini muhokama qilish noto'g'ri.
Hamma narsa maydonda qolsin. Bu shunchaki futbol, emociya beradigan tillo sport turi. Boshqa chegaralarni buzib o'tishga arzimaydi.
• Davron Ergashevni qiliqlari menga ham yoqmadi, lekin men unga golni qanday nishonlashni o'rgatishim yoki o'z uyidagi durangdan quvonishini cheklab qo'yishga haqqim yo'q. Xarakteri shunaqa ekan. O'tgan yili ham shunday qilgan va «Nasaf» o'shanda maydonda 4ta gol bilan javob bergandi. Bu yil «Nasaf» maydonda unga javob berolmadi, balki vaqt etmagandir. Lekin maydondan tashqarisida unga bu qilig'i uchun javob berish yoki undan tushuntirish so'rash professionallik tarafidan ham noto'g'ri.
O'yin tugadi va bu mavzu ham yopilgani durust. Ikkinchi qismni Qarshidagi maydonda ko'raylik, bo'ldi.
Bir tarafdan bu narsa ushbu jamoalar o'rtasidagi keskinlikni oshirib, principiallik yaratib qo'ydi. Katta o'yinlari soni oshdi. Lekin bugungi holat katta bir janjalli vaziyatni yaratishga arzimaydigan narsa edi. SHunchaki emociya va tayyor g'alabani qo'ldan chiqarishdan keyingi alam.
Bo'pturadi.
Bosh sahifaga
245