Asror Aliqulov: "Biz futbolchilarni tanlashda xato qildik va shu xatolarimiz qimmatga tushmoqda"

- O'yin haqidagi fikrlaringiz?

- Bugun mag'lub bo'ldik va barcha aybni o'z bo'ynimga olaman. Birinchi golga qadar yomon o'ynamayotgan edik. Gol o'tkazib yubordik va o'yin o'zgarib ketdi, qizil kartochkadan so'ng esa raqib maydonda xohlagan ishini qildi.

- Islom Kenjaboevning etirozini murabbiy sifatida hurmatsizlik deb hisoblamaysizmi? CHunki siz murabbiysiz, futbolchi sifatida Kenjaboevdan ko'proq o'yin o'tkazgansiz, o'zbek futbolida obro'yingiz bor...

- U futbolchining o'ziga bog'liq. Biz jamoa sifatida uning harakatini noto'g'ri deb hisoblaymiz. Bu jamoadagi ichki nizo va shunday holatlar jamoaning o'yiniga albatta tasir o'tkazadi.

- Murabbiy sifatida jamoadagi ichki muhitni izdan chiqarib yuborgandek taassurot qoldiryapsiz?

- Bunga sabab bizda futbolchilar yo'qligi. Biz jamoadagi futbolchilarni almashtira olmaymiz. Biz futbolchilarni tanlashda xato qildik va shu xatolarimiz qimmatga tushmoqda. Biz ko'p futbolchilarni yig'ib oldik. Futbolchi maydonda o'zini shunday tutsa murabbiy uchun qiyin. Biz yangi jamoa tuzganmiz, jamoadagi ichki muhit ko'proq o'tgan mavsum to'p tepgan futbolchilarga bog'liq va ular jamoadagi ichki muhitni yaratishlari kerak edi. Tarkibimizda juda ko'p yangi futbolchilar bor. Masalan legionerlarimiz har xil qitalardan va ular hali yaxshi chiqishib keta olishmadi.

- Ushbu muammolarning kelib chiqishiga sabab intizommi yoki o'yindagi muammolar?

- Ko'p muammolar intizom tufayli kelib chiqmoqda. Maydonda o'z vazifasini bajarmaydigan futbolchi sabab, qolgan poziciyalarga ko'proq bosim bo'ladi. Ko'p holatlarda ham futbolchilarga xarakter etishmayapti.

- Jamoadagi eng muammoli poziciya qaysi?

- Bizga pleymeker etishmayapti. Hujumga o'tayotgan chog'imiz o'yinni nazorat qiladigan va himoyada ham yordam beradigan sifatli futbolchi etishmayapti jamoaga. Stanisavlevichni yoqotganimiz bizga qimmatga tushdi. Transferlar oynasida u bilan kelishib olgandik, lekin u O'zbekistonga qaytib kelganidan so'ng boshqa jamoaga borib qo'shildi. Biz tarkibimizda bor futbolchilar bilan harakat qilishga majburmiz.