O'zbekistonlik o'smirlarning Osiyo chempionatidagi ishtiroklariga nazar
Mustaqillikka erishganimizdan buyon O'zbekiston o'smirlar terma jamoasi qita musobaqasining final bosqichida umumiy hisobda 9 marotaba ishtirok etgan (1994, 1996, 2002, 2004, 2008, 2010, 2012, 2014, 2016). Bu boradagi ilk qadamlar 1994 yilga borib taqaladi. O'shanda turnir formati 10ta terma jamoa ikki guruhga bo'lingan holda ishtirok etgan, keyingi bosqichga faqat 1,2 o'rin egalari yo'l olgan. O'zbekistonlik o'smirlar "A" guruhida so'nggi o'rinni olgan. Bu boradagi birinchi yaxshi natija 2002 yil qayd etilgan, Dilshod Nuraliev ustozlik qilgan jamoamiz Osiyo chempionatini kuchli to'rtlikda yakunlagan. Jahon chempionatiga esa o'sha paytda faqat 3ta jamoaga yo'llanma berilgan. 2004 yil Islom Ahmedov ustoz bo'lgan o'smirlarimiz guruhda qolib ketishadi. 2008 yil Toshkent ilk marotaba o'smirlar o'rtasidagi Osiyo chempionatini qabul qilgan. Robert Gay boshchilik qilgan terma jamoa mundial yo'llanmasi beriladigan chorak final bahsida Janubiy Koreyaga mag'lub bo'lib, erta tugatishadi. Raqib safidan Son Xyong Min keyinchalik APL darajasidagi futbolchi bo'lib etishib chiqdi. 2010 yil poytaxtimiz ketma-ket ikkinchi bor U-16 Osiyo chempionatini o'zida qabul qildi. Bu futbolimiz tarixidagi yuz berayotgan ilk voqelik sanalardi. Aleksey Evstafeev shogirdlari uyda o'tgan turnirning finaliga qadar etib borgan, yakuniy pallada KXDR omadi chiqib qolgandi. O'smirlar terma jamoamiz o'z tarixida ilk bor Jahon chempionatiga yo'llanma olgan. Futbolimiz o'zining pikiga chiqqan paytlar. 2012 yil oradan 10 yil o'tib mufaqqiyat sari etaklash yana Dilshod Nuralievning chekiga tushdi. Eronda bo'lib o'tgan U-16 Osiyo chempionatida terma jamoamizga teng keladigani topilmadi. Bu hozircha biz uchun eng yaxshi natija bo'lib turibdi. CHunonchi, keyingi 2 musobaqada vakillarimiz chorak finaldan ortga qaytishga majbur bo'lishgani yodingizda bo'lsa kerak. 2014 yil Aleksandr Mochinov, 2016 yil Temur Olimxo'jaev.
Jahon chempionati uddalab bo'lmas vazifa emas
Bu yosh toifasida biz 2 marotaba JCHga chiqqanmiz. 1994 yillar bilan Aleksey Evstafeev va Dilshod Nuralievning 1996 yillari. Meksikadagi kichik mundialda kuchli sakkiztalikka kirgan bo'lsak, BAA mezbonligidagi Jahon chempionatida nimchorak final so'nggi bosqich vazifasini o'tagan. Etiborli tomoni, 2013 yilgi U-17 Jahon chempionati ham so'nggisi hisoblanadi. Demak Jamoliddin Rahmatullaev va uning shogirdlarida 10 yil oldingi natijani takrorlash talab etiladi. 24ta mamlakat ishtirok etadigan JCH 10 noyabr kuni Peruda boshlanadi va 2 dekabrga qadar davom etadi. Qura tashlash marosimi avgustga belgilangan.
O'zbekistonning U-16 Osiyo chempionatidagi to'purarlari
Timur Hakimov 5ta gol
Abbosbek Maxstaliev 4ta gol
Suhrob Nurulloev 3ta gol
Rasul Yo'ldoshev 3ta gol
Jasurbek Hakimov 2ta gol
Abdumutallib Abdullaev, Aleksandr Galeev, Oyatullaxon Muhitdinov, Maksim Utkin 2ta gol
Lutfulla To'raev 2ta gol
Akobir To'raev 2ta gol
Kimlarning kuzatishimiz kerak?
2006 yillar terma jamoamizning potencialiga shubha yo'q. Bu terma jamoani Jamoliddin Rahmatullaev qo'lga olganiga 1 yil, undan avval ham Server Jeparovning shtabida bo'lgan. Yigitlarni juda yaxshi biladi. Garchi bular hali o'smir bo'lganiga qaramay ayrimlari allaqachon ko'zga ko'rina boshladi.
Laziz Mirzaev ("Lokomotiv") - Terma jamoamizning sardori va matori. Standartlarda unga teng keladigani yo'q. "Odil Ahmedov FA" tarbiyalanuvchisi hisoblangan Laziz 2021 yil PFL tomonidan o'tkazilgan U-16 O'zbekiston chempionatidayoq etiborga tushib bo'lgandi. Lazizni potenciali Toshkentda o'tgan saralashda yanada ochildi. Ayniqsa Janubiy Koreya bilan bahsda jarima zarbasini qoyilmaqom amalga oshirib Osiyo chempionatiga borishimizga ulkan hissa qo'shdi, deya olamiz. "Lokomotiv" klubi safida o'tgan mavsumda katta futbolda debyut qilishga ham ulgurdi. Tailanddagi turnir uning faoliyatida yangi sahifa ochsa ajabmas.
Ollobergan Karimov ("Bunyodkor") - "Bunyodkor"da uni Guti, deb chaqirishadi. Xorazmlik yigitcha 2018 yil Xorazm FAdan "Bunyodkor"ga ko'chib o'tgan. O'tgan yili Ivan Boshkovich qo'l ostida asosiy tarkibda debyut qildi va ilk urinishdayoq Farruh Ikromovning goliga assistenlik qildi. Yozda klubning "Dinamo Zagreb" bilan hamkorligi doirasida Xorvatiyada ko'rikda bo'lib qaytdi. Hujumkor yarim himoyachi oldinga o'tishga qo'rqmaydi, vaziyatlarni o'qiy oladi. Gutidan shaxsan o'zim ko'p narsa kutmoqdaman.
Dilshod Abdullaev ("Odil Ahmedov FA") - Bugungi kunda "Paxtakor" o'rinbosarlar tarkibida muntazam o'yin amaliyotiga ega bo'layotgan himoyachi Dilshod Abdullaevning ham o'yinlarini o'tgan yili Mirabror Usmonov xotira turniri, Toshkentdagi saralash bosqichi uchrashuvlarida kuzatdim. Harakatlarida sovuqqonlik bor. Bu futboldagi eng muhim narsa. SHu jihat Dilshodning asosiy ustun tarafi. Himoyachi bo'lishiga qaramasdan gollar urishga harakat qiladi. Qaysidir manoda Husniddin Aliqulovga o'xshab ketadi.
Amirbek Saidov ("Bunyodkor") - "CAFA U-16 Championship 2022" musobaqasida raqiblar darvozasiga gollarni tahlagan hujumchi. Bu yil "Bunyodkor" o'rinbosarlari safida 2ta o'yinda maydonga tushdi va 2ta gol urdi. Umuman bu musobaqada hujum chizig'imizda raqobat juda yaxshi, deya olamiz. Amirbek bilan bir qatorda Quvonchbek Abraev, SHodiyor SHodiboev, Abdulhamid Turg'unboevlarni ham keltirishimiz mumkin.
Bu shunchaki shu vaqtgacha bo'lgan, kuzatganlarim. Balki musobaqda yana boshqa yangi nomlar yangrar. Muhimi futbolchilarimiz yurtimizga yorug' yuz bilan qaytishsin. Olg'a O'zbekiston!
Bosh sahifaga
235