Bu terma jamoani Jamoliddin Rahmatullaev qo'lga olganiga 1 yil, undan avval ham Server Jeparovning shtabida bo'lgan. Yigitlarni juda yaxshi biladi. Garchi bular hali o'smir bo'lganiga qaramay ayrimlari allaqachon ko'zga ko'rina boshladi. O'z klublari safida maydonga tushdi. Evropa klublari ko'rigida bo'lib qaytdi.
Laziz Mirzaev ("Lokomotiv") - Terma jamoamizning sardori va matori. Standartlarda unga teng keladigani yo'q. "Odil Ahmedov FA" tarbiyalanuvchisi hisoblangan Laziz 2021 yil PFL tomonidan o'tkazilgan U-16 O'zbekiston chempionatidayoq etiborga tushib bo'lgandi. Lazizni potenciali Toshkentda o'tgan saralashda yanada ochildi. Ayniqsa Janubiy Koreya bilan bahsda jarima zarbasini qoyilmaqom amalga oshirib Osiyo chempionatiga borishimizga ulkan hissa qo'shdi, deya olamiz. "Lokomotiv" klubi safida o'tgan mavsumda katta futbolda debyut qilishga ham ulgurdi. Tailanddagi turnir uning faoliyatida yangi sahifa ochsa ajabmas.
Ollobergan Karimov ("Bunyodkor") - "Bunyodkor"da uni Guti, deb chaqirishadi. Xorazmlik yigitcha 2018 yil Xorazm FAdan "Bunyodkor"ga ko'chib o'tgan. O'tgan yili Ivan Boshkovich qo'l ostida asosiy tarkibda debyut qildi va ilk urinishdayoq Farruh Ikromovning goliga uzatmani amalga oshirdi. Yozda klubning "Dinamo Zagreb" bilan hamkorligi doirasida Xorvatiyada ko'rikda bo'lib qaytdi. Hujumkor yarim himoyachi oldinga o'tishga qo'rqmaydi, vaziyatlarni o'qiy oladi. Gutidan shaxsan o'zim ko'p narsa kutmoqdaman.
Dilshod Abdullaev ("Odil Ahmedov FA") - Bugungi kunda "Paxtakor" o'rinbosarlar tarkibida muntazam o'yin amaliyotiga ega bo'layotgan himoyachi Dilshod Abdullaevning ham o'yinlarini o'tgan yili Mirabror Usmonov xotira turniri, Toshkentdagi saralash bosqichi uchrashuvlarida kuzatdim. Harakatlarida sovuqqonlik bor. Bu futboldagi eng muhim narsa. SHu jihat Dilshodning asosiy ustun tarafi. Himoyachi bo'lishiga qaramasdan gollar urishga harakat qiladi. Qaysidir manoda Husniddin Aliqulovga o'xshab ketadi.
Amirbek Saidov ("Bunyodkor") - "CAFA U-16 Championship 2022" musobaqasida raqiblar darvozasiga gollarni tahlagan hujumchi. Bu yil "Bunyodkor" o'rinbosarlari safida 2ta o'yinda maydonga tushdi va 2ta gol urdi. Yakuniy nuqtani qo'yishda Amirbek ancha toblandi. Saralash bahslarida ham o'z hisobiga gol yozdirib qo'ydi. Umuman bu musobaqada hujum chizig'imizda raqobat juda yaxshi, deya olamiz. Amirbek bilan bir qatorda Quvonchbek Abraev, Oybek O'rmonjonov, SHodiyor SHodiboev, Abdulhamid Turg'unboevlar ham bu turnirda porlab chiqishlarini kutish mumkin. Aytishingiz mumkin, bu yoshda xulosa qilish ertaku. Lekin yigitlar allaqachon 18 yoshga qarab ketmoqda. O'zlarini ko'rsatadigan vaqt keldi.
Bosh sahifaga
256