Jamoaning yosh hujumchisi Ulug'bek Hoshimov "Neftchi"ning Toshkentdagi yig'iniga borib qo'shildi. Biz bu borada uning fikrlari bilan qiziqdik.
"Ha, "Neftchi"ga o'tdim. Sababi, hozirgi kunda "Paxtakor"da o'ynab ketishim 100 foizlik imkoniyatdan 0 foiz edi. To'g'ri, "Paxtakor" ayni paytda yurtimizda va Osiyo qitasida top jamoalardan biri hisoblanadi. Menga bu jamoada to'p tepishim uchun albatta vaqt kerak, deb o'ylayman.
"Paxtakor"ning Dubaydagi yig'inida ishtirok etib qaytdim. Tajribali hujumchi Igor Sergeev jamoani tark etgach meni xorij yig'iniga olib ketishga qaror qilishdi. Agarda Sergeev klubda qolganida balki, men ular bilan ketmas edim. Klubda qo'limdan kelganicha harakat qildim va imkonim boricha o'zimni ko'rsatdim. Bu narsalar faqat menga bog'liq emas. Klubda rahbariyat, murabbiylar shtabi bor.
Agar meni o'ynatishmoqchi bo'lishganida "Neftchi"ga sotishmagan bo'lishardi. Qandaydir kamchiligimni ko'rishgan.
"Neftchi" taklifi men uchun kutilmagan sovg'a bo'ldi, desam yanglishmayman. CHunki, bosh murabbiy Ilhom Mo'minjonovning o'zlari menga qiziqish bildirib avvaldan kuzatib yurgan ekanlar. Maqsadim shu jamoada yaxshi darajada to'p tepib yuqori natijalarga erishish. Barchamiz birgalikda "Neftchi"ni Superligaga qaytarishni istaymiz.
"Paxtakor"ning ko'p muxlislari bilan to'g'risi aka-ukadek bo'lib qolganmiz. Jamoadan ketish doim qiyin kechadi. Boisi, boshqa muhit, yangi do'stlar davrasiga moslashish oson emas. Lekin, bu - futbol. Unda hamma narsa siz istagandek bo'lmaydi. O'ylaymanki, ular menga muxlislik qilishda davom etishadi. Ishqibozlarning orzusi men kabi yosh futbolchilarni Evropa arenalarida ko'rish. Tabiiyki, biz shu ishlarni uddasidan chiqa olsak, Evropa jamoalarida o'ynasak o'zbekistonlik futbolchilarga qiziqish ortadi. Barchalariga sog'lik va salomatlik tilayman",- deydi Ulug'bek Hoshimov.
Bosh sahifaga
561