Umarali Rahmonaliev: "Gvatemala bilan o'yinda diskvalifikaciyani emas g'alabani o'yladim, Braziliyani chiqib ketishi esa haqiqiy sensaciya bo'ldi"

Xabaringiz bor, Timur Kapadze mazkur yig'inga yaqinda U-20 Jahon chempionatida ishtirok etib qaytgan bir nechta futbolchilarni jalb qildi. Ular endilikda yosh emas, balki olimpiyachilardir. Kecha ko'tarinki ruhda bo'lib o'tgan mashg'ulotdan so'ng Umarali Rahmonalievning fikrlariga quloq tutdik. 

- Yoshlar terma jamoasidan so'ng olimpiyachilar bilan mashg'ulotlar qanday ketyapti? Yangi jamoaga moslashish qiyin bo'lmayaptimi?

- Jahon chempionati qizg'in ruhda o'tdi. Biz uchun katta maktab vazifasini bajardi, desak mubolag'a bo'lmaydi. Ko'p narsa o'rgandik. Yutishni, mag'lubiyatdan qanday qilib chiqib ketishni. Bundan ham yaxshi natija qayd etishni istagandik. Ammo so'nggi daqiqada diqqat etishmadi. Hozirgi yig'inga to'xtalsam, mashg'ulotlarni boshlab oldik. Juda yaxshi va ahil jamoa shakllangan. SHu bois bu erda faqat o'sish mumkin. Bildirilgan ishonchni oqlashga harakat qilamiz.  Albatta, yangi jamoaga qo'shilishda ozgina bo'lsa ham ko'nikma hosil qildim. Hozircha qiyinchilik tug'idrgani yo'q. 

- Isroil bilan uchrashuvni diskvalifikaciya sabab o'tkazib yubordingiz. Gvatemala bilan o'yin vaqtida keyingi o'yinda qatnashmasligingizni bilarmidingiz?

- Bu haqida o'ylaganim yo'q. Maydonda birinchi navbatda g'alaba qozonish maqsadimiz edi. O'sha vaziyatda ikki nafar himoyachimiz oldinda qolib ketgani sababli taktik fol ishlatishga majbur bo'ldim. Afsuski ikkinchi sariq kartochkani oldim. 

- Musobaqa favoritlaridan biri Braziliyaning Isroilga yutqazib chiqib ketishi kutilmagan holat bo'ldimi?

- Isroil terma jamoasi jismoniy holati alo darajada bo'lgani uchun tartibli futbol ko'rsatdi. Haqli ravishda g'alaba qozondi. Braziliyani chiqib ketishini albatta sensaciya sifatida qabul qildim. 

- "Rubin" Rossiya Premer-ligasiga chiqdi. Bu sizning klubdagi taqdiringizga qanchalik tasir o'tkazadi?

- "Rubin"ning elitaga qaytishi katta yutuq hisoblanadi. Ishonch taqdim etilsa, o'zbekistonlik futbolchilar Premer-ligada bemalol harakat qilib, futbolimiz rivojiga hissa qo'shishga harakat qilamiz. 

Abdulaziz Iskandarov suhbatlashdi