Ishxonaga yo'l olishda yaqinda jo'nab ketgan avtobusga kech qoldim. Tana azomning bir parchasiga aylangan telefonimda kirakash haqini hisoblab ko'raman. Yo'q, bugun och qolishni istamayman. Yaxshisi, keyingi avtobusni kuta qolaman. Kun davomida odamni somsa holiga keltirib qo'yadigan havo haroratidan "kuch razryajena" holatiga kelib, o'zimni o'rindiqqa tappa tashlayman. Tappa tashlayman deyish ham noto'g'ri, aks holda qovurg'alarimning qisirlaganini eshitishim hech gap emas. Atrofida pashshalar festival o'tkazayotgan shipdagi xira lampochkaga nigohimni qadagancha, o'yga cho'maman. Hech kimning xayoliga kelmasam ham, oyiga bir marotaba yo'qlab turishni kanda qilmaydigan ijara uy egasi tez orada hol-ahvol so'rashni boshlay boshlaydi. Oy so'ngida arxeologiyaga bo'lgan mehrim jo'shib ketadi hamda sopol ko'zaning "surati"ni topish harakatiga tushib qolaman. Xayolimning bir oyog'i bog'da, biri esa Bag'dodda bo'lib turgan soniyalarning har birida Saudiya Arabistonida to'p tepayotgan yulduz futbolchi Krishtianu Ronaldu millionlab pul topadi. Ha, uning nafas olishi ham pul. Nafasidan ham pulning hidi keladi. Siz ham chuqur nafas olib ko'ring-chi! Jin ursin, namuncha hammayoq chang! Keling, portugaliyalik forvard o'zbek mullajiringida taxminan qancha ishlab topishini chamalab ko'ramiz.
Ronaldu soniyasiga 80723 so'm ishlaydi. Bu pulga bir kun to'yib ovqatlanish mumkin. Lapsha eyish ham jonga tegdi. Demak, davom etamiz.
Daqiqasiga 4843380 so'm. Telefonim boshim singari qotadigan bo'lib qolgan. Iloji bo'lsa, ikkalasiniyam almashtirish kerak.
Soatiga 293274007 so'm. Krishtianu aka, Tracker muborak. Men odatda, past ulovlarda yurishni yoqtirmayman. SHu bois, qadrimga yarasha transportda ishga qatnayman, yani avtobusda.
Kuniga 6986208964 so'm. Maktabda matematika darsidan qochganim ko'p pand beradi-da. To'g'ri-da, bunaqa sonlarga ishim tushmasa nima hojati bor?! Ronalduning bir kunda topadigani esa O'zbekistonda butun umr yashashga etadi. Bola-chaqasiga ham. Lekin u xotinni ikkita qilish haqida o'ylamasa kerak.
Haftasiga 48874108934 so'm. Bunaqa mayda-chuyda ishlarga boshimni qotirishga vaqtim yo'q. O'zingiz hisob-kitob qilavering. Atigi 48 mlrd so'm ekan.
Oyiga 211347498096 so'm. Avgustda imtihon topshiradigan abiturientbop savol ekan.
Yiliga 2539105359070so'm. Toshkentni sotuvga qo'ygan post o'chirib tashlangan bo'lsa kerak-a?! Yo'q, bunaqada hayotning qizig'i qolmaydi. Naq, Martin Iden bo'lib ketishim hech gap emas. Ko'p xayol surish ham yaxshi emas. Yaxshisi, o'rindan ko'tarilib, ishlash kerak. Jin ursin, yana avtobus o'tib ketib qolibdi. Taksida ketardim-u, yuqorida aytganimdek, obro'mga to'g'ri kelmaydi. Nachora, oxirgi paytlarda vazn orttirib, naq 60 kiloga chiqqandim. Quyosh tafti urib turgan bekatda yana avvalgi holatimga qaytishim hech gap emas.
Oqil Abdubarnoev tayyorladi.
Bosh sahifaga
386