Mavsumning dastlabki qismini Eronning "Sanat Naft" klubida o'tkazgan futbolchi endilikda farg'onaliklar sharafini himoya qiladi. Yangi jamoasi, taklif va fors o'lkasidagi faoliyati haqida SHarof Muhitdinovning fikrlarini tingladik.
- Dastlab Erondagi faoliyatingizga to'xtalib o'tsangiz. Qanday taassurotlar qoldi? Umuman, Eron klublari bizning futbolchilarga qanchalik mos?
- Erondagi faoliyatim yaxshi o'tdi, deb o'ylayman. CHunki oldimizga qo'yilgan vazifani bajardik.
- U erda uzoq vaqt barqaror o'ynab ketish ko'proq qaysi omillarga bog'liq?
- Bilamizki, Eronda ko'proq jismonan va kuchga asoslangan futbol o'ynaladi. Barqaror o'ynab ketish uchun yuqoridagi xislatlardan tashqari biroz vaqt ham talab etiladi.
- Eron klubi faoliyatingizdagi to'g'ri qaror bo'ldimi? Ko'nglingiz to'ldimi?
- Albatta, ko'nglim to'ldi. Murabbiylar, rahbariyat ham qoniqdi, deb o'ylayman. Ular menga yana shartnoma taklif qilishdi.
- "Neftchi" taklifining o'ziga jalb qilgan asosiy tomoni nimada bo'ldi? Qaysi faktor klub chorlovini qabul qilishingizda ustunlik berdi?
- Qanday jamoaga kelganimni, masuliyatni tushunib turibman. "Neftchi" – tarixiy jamoa. Klub oldiga qo'yilgan vazifani bajarishga o'z hissamni qo'shmoqchiman.
- "Neftchi"ning birinchi davradagi natijalarida kimning hissasi ko'proq bo'ldi?
- Bu natijalar shunchaki tasodif emas. Muvaffaqiyatda barchaning hissasi bo'lishi tabiiy. Muxlislar Farg'onada doim yuqori o'rinlarni, yorqin g'alabalarni kutishadi. Ularsiz futbol qiziq emas.
- Ikkinchi davrada nima kutish mumkin? "Nasaf" bilan sovrinli o'rinlarni egallagansiz, "Paxtakor" bilan chempionlikni qo'lga kiritgansiz. "Neftchi" bilan maqsadlar qanday?
- Maqsad – faqat yuqori o'rinlar. Birinchi davradan murabbiyni ko'ngli to'lgan, deb o'ylayman. Endilikda tayyorgarlikni puxta olib borishimiz shart. Ikkinchi davrada ham stadionga kelganlarni g'alabalar bilan xursand qila olamiz.
- "Neftchi"ga kelib qo'shilishingiz tez yuz berdi. Yana takliflar bormidi?
- Boshqa takliflar bor. Ammo ko'nglim "Neftchi"ni tanladi. Xudo xohlasa, bu jamoa bilan ham sovrin yutishni istayman. O'tish tezda yuz berganiga kelsak, transfer oynasi ochildi va biz kelishuvga erishdik.
Abdulaziz Iskandarov suhbatlashdi
Bosh sahifaga
323