Dastlab, “Jenoa”da, keyin Rimda, o'tgan mavsum “Speciya”da. Aftidan, surxondaryolik futbolchining “etiksimon” mamlakatdagi endigi “bekati” “Kalyari” bo'ladi. Har qalay, bu haqda Eldor yoki unga aloqador shaxslar ochiq aytmagan bo'lsa-da, xorij insayderlari allaqachon bu haqda xabar berib bo'ldi.
Xususan, taniqli insayder Nikola Skira SHomurodov faoliyatini “Kalyari”da davom ettirishini malum qildi. Unga ko'ra, tomonlar o'zaro kelishib olishgan. “Kalyari” Eldorni sotib olish sharti bilan ijaraga oladi. Futbolchi bilan shartnoma 2027 (1+3) yilga qadar amal qiladi.
Xo'sh, o'zi “Kalyari” qanday jamoa? Klub joylashgan shahar-chi?
Ehtimol, Eldor YouTube’dan ushbu shahar to'g'risidagi videolarni ko'rayotgandir, biz ham o'quvchilarni shu haqda tanishtirishga ahd qildik.
Sardiniya oroli yoki bo'lmasa viloyatida joylashgan ushbu hududning aholisi 155 mingdan ortiq. Hudidi 85,01 km kv dan ortiq bo'lgan hududda yashovchi aholining katta qismini italyanlar va sardiniyaliklar tashkil qiladi. 30 oktyabr – shahar kuni deb belgilangan.
“Kalyari” futbol jamoasi haqida gapirganda, uning tashkil etilganiga 103 yil bo'lganini aytish joiz. 1920 yilda tashkil qilingan klub ko'p yillar “A” va “B” Seriyasida o'ynagan. Yangi mavsumdan boshlab klub “A” Seriyada ishtirok etadi.
O'z vaqtida “Lester ertagi”ni yaratgan murabbiy Klaudio Raneri jamoa bosh murabbiyi hisoblanadi va aynan u o'tgan mavsum jamoani “B” seriyadan olib chiqa bildi.
Klub stadioni bo'lgan “Sardiniya arena” o'z bag'riga 23 486 nafar muxlisni sig'dira oladi.
Jamoa “A” Seriyada ilk bor 1964 yilda o'ynagan va o'sha mavsumdayoq 7-o'rinni egallagan. 1993-94 yilgi mavsumda “Kalyari” UEFA Kubogi finaliga chiqqan. CHorak finalda Turinning “Yuventus”ini mag'lub etgan jamoa yakunda Milanning “Inter”iga mag'lub bo'lgan.
Klubda bugunga qadar Oskar Tabares (1994—1995, 1999), Massimiliano Allegri (2008—2010), Janfranko Zola (2014—2015) kabi mashhur murabbiylar faoliyat olib borgan.
Umuman olganda jamoaning ijobiy natijalari quyidagicha:
“A” Seriya doirasida:
1969/70 yilgi mavsum – chempion
1968/69 yilgi mavsum – kumush medal
“B” Seriya doirasida:
2015/16 yilgi mavsum – chempion
Italiya kubogi doirasida:
1968/69 – finalchi
Eldor SHomurodov qachon, qanday shartlar asosida klubda faoliyatini boshlashi hozircha rasman aniq emas. O'zbekistonlik futbolchining ushbu klubdagi o'yinlarida omad va zafarlar tilab qolamiz.
S. O
Bosh sahifaga
2237