Video  Ivan Boshkovich: "Bunyodkor" men kutgandan ancha yaxshi o'ynadi"

- Bugungi uchrashuv haqidagi fikrlaringiz?

- O'zingiz ko'rdingiz, o'yin jangovar ruhda o'tdi. Birinchi taymda ancha chiroyli futbol ko'rdik. To'g'risini aytsam, "Bunyodkor" men kutgandan ancha yaxshi o'ynadi. Ular to'pni nazorat qilishdi. Men "Bunyodkor"ning kuchsiz taraflarini bilaman va "qaldirg'ochlar" tarkibidagi futbolchilarni ham yaxshi taniyman. Birinchi gol urib olganimiz bizga ancha katta foyda bo'ldi. Sifatli o'yin namoyish etib, g'alaba qozondik. "Bunyodkor"ga omad tilayman.

- O'zingizning eski jamoangizni mag'lub etdingiz. Bu uchrashuv siz uchun principial ahamiyatga egamidi?

- Oddiy o'yindek o'tdi. O'yinga qadar ko'pchilik shu narsani eslatdi, lekin men har doimgi o'yindek tayyorgarlik ko'rdim. Albatta, uch yil ishlagan jamoamga qarshi o'ynash g'alati bo'ldi, biroz boshqacha emociyalarni his qildim. "Bunyodkor" o'yinlarini kuzatib boraman va ularga muxlislik qilaman.

- Yangi futbolchilarning o'yiniga baho berib o'tsangiz?

- Transferlar oynasida ko'proq yosh futbolchilar bilan shartnoma imzoladik va bitta legionerni o'z safimizga qo'shib oldik. Ikki nafar futbolchi esa ijara asosida. Yosh futbolchilar o'sishga erisha oladi va kelajakda "So'g'diyona"ga ko'p yordam berishadi.

- Lupche Dorievning o'yinini qanday baholaysiz. U birinchi taymda ancha faol edi, lekin ikkinchi taymda biroz charchab qolgandek.

- Men u futbolchini yanvardan beri kuzatib bormoqdaman. Lupche bilan bir yarim yillik shartnoma imzoladik. Unga ishonaman va adaptaciya jarayonidan o'tib olganidan so'ng, u o'zining eng yaxshi o'yinlarini ko'rsatadi degan umiddaman.

- CHernogoriyalik legioner "So'g'diyona"ga kelishidan avval CHernogoriyaning ikkinchi divizionidagi klubda o'ynagan va uning sobiq klubi ushbu mavsum uchinchi divizioniga tushib ketdi. Jamoaga yarim professional futbolchini qo'shib olishdan maqsadingiz nima?

- U mening tarbiyalanuvchim va men uni kelajak uchun jamoaga qo'shib oldim. U hali yosh va kelajakda "So'g'diyona"da o'ynab keta oladi.

- Transferlar oynasida siz istagan barcha poziciyalar kuchaytirildimi?

- Ha, men futbolchilar bilan ishlashni yoqtiraman. Mening futbol uslubimga mos tushadigan futbolchilarni qidiraman. Biz qo'yib yuborgan to'rtta futbolchi jamoa uslubiga mos tushmasligi sabab jamoani tark etishdi. Yangi futbolchilarni ham shu sababdan jamoaga olib keldik.