O'zbekiston ayollar terma jamoasi bosh murabbiyi Bahrom Norsafarov bilan suhbat

Terma jamoamiz bosh murabbiyi Bahrom Norsafarov championat.asia saytiga qisqa intervyu berdi.

- Bahrom aka, Turkiyadagi yig'in qanday o'tmoqda? SHaroitlar qanday?
- Turkiyadagi sharoitlar, maydonlar juda ham yaxshi holatda. Afsuski bu yig'inga Karachik, Galimova va Xusniddinovani olib kela olmadik. Sababi ularda jarohat bor. Bu qizlarimizni keyingi musobaqalarga asrashga qaror qildik.

- Turkiyadagi musobaqadagi raqiblar haqida qanday fikrdasiz?
- Afrika qitasi terma jamoasiga qarshi hozirga qadar umuman o'ynamagandik. Lekin Ekvator Gvineyasi va Nigeriya terma jamoalari haqida etarli malumotlarga egamiz. Bu ikki jamoa Jahon chempionati ishtirokchisi hisoblanadi. So'nggi raqibimiz esa Rossiya chempioni Moskvaning CSKA klubi bo'ladi.

- Bilamizki terma jamoaning kuchli bo'lishi milliy chempionatga bog'liq. O'zbekiston chempionatimiz saviyasi o'tgan yillar bilan taqqoslaganda o'sganmi?
- Ayni paytda O'zbekiston chempionatida 5ta raqobatbardosh klub bor. Bizda ham ayollar futboli ancha rivojlandi. FIFA reytingida O'zbekiston ayollar terma jamoasi 41-o'rinda bormoqda.

- Bugungi kunda terma jamoaning qaysi chizig'i ko'proq havotirga solmoqda?
- CHap qanot himoyachimiz Husniddinova Soliha jarohat olganini aytdim. O'tgan mavsum to'purari Lyudmila Karachik ham tarkibimizda yo'q. Lekin ularning o'rnida chempionatimizda o'zini yaxshi ko'rsatgan boshqa o'yinchilarimiz bor.