"Yuventus" "Sassuolo" to'purari bilan shartnoma shartlarini kelishib oldi

"Yuventus" "Sassuolo" vingeri Domeniko Berardi bilan kelishuvga erishdi. Bu haqda "La Gazetta dello Sport" xabar bermoqda.

Tomonlar 4 yillik shartnoma tuzishga kelishib oldilar. Agar transfer amalga oshsa, futbolchi bonuslarni hisobga olmaganda yiliga 3 million evro oladi.

"Byankoneri" futbolchi uchun 20 million evro va yana 4 million bonus taklif qiladi. Turinliklar yosh futbolchilardan birini ham shartnomaga qo'shishga tayyor.

Berardi o'tgan mavsum "Sassuolo"ning eng yaxshi to'purari va assistenti bo'lgandi. 29 yoshli italiyalik futbolchi so'nggi mavsumda 27 ta o'yin o'tkazib, 13 ta gol urgan va 7 ta golli uzatmani amalga oshirgan.