Gonkong U-23 bosh murabbiyi: "Imkoniyatlarimiz pastliligiga qaramay, munosib qarshilik ko'rsatishga harakat qilamiz"

Bugun guruh bosqichi uchrashuvlaridan oldin matbuot anjumani o'tkazildi. Unda Gonkong U-23 bosh murabbiyi Szeto Man CHun va futbolchi Joy Yin ishtirok etdi. 

"Avvalambor, O'zbekistonga kelganimizdan xursandmiz. Guruhdagi raqiblarni o'rganib chiqyapmiz. O'zbekiston va Eron tezkor, texnikasi yuqori jamoa hisoblanadi. O'ylaymanki, bu erdan kerakli natija bilan ortga qaytamiz", – dedi murabbiy Szeto Man CHun. 

"Har bir o'yin qiyin o'tadi. Bizning o'z rejalarimiz bor. Musobaqaga yuqori natijalarni ko'zlab kelganmiz", – deydi futbolchi Joy Yin. 

- Gonkong guruh autsayderi sifatida guruh favoritlariga qanday qarshilik ko'rsatmoqchi?

- Fikringizga qo'shilaman. Bizga nisbatan jamoalar kuchli. Imkoniyatlarimiz past va lekin yaxshi natija uchun harakat qilamiz. 

- Guruhdagi terma jamoalarning qaysi jihatlari etiboringizni tortdi?

- Jamoalarning videolarini ko'rib chiqish asnosida biz va raqiblar o'rtasida farq kattaligini sezdim. Jamoalar ochiq o'yin ko'rsatmaydi va kichik detallardan foydalanib ketishga harakat qiladi.