Turnir jadvalida peshqadam bo'lib turgan "sherlar"ning natijalarida albatta Quvvatovning ham hissasi bor. Ayniqsa birinchi davrada "Navbahor", "Turon", "Buxoro" bilan uchrashuvlarda qaytargan penaltilari jamoasiga 9 ochkoni taqdim qildi. CHempionlik uchun kurash va boshqa mavzularda Sanjan Quvvatovga bir nechta savollar bilan murojaat qildik.
- "Paxtakor" mavsumni bir tekis o'tkaza olmayotgan bo'lsada, turnir jadvalida birinchi o'rinda ketmoqda. Bu chempionlik xarakteri sababmi yoki boshqa jamoalar etarlicha kuchaymaganidanmi?
- Albatta bu yil mavsum davomida ochko yo'qotishlar, ayrim pallalarda "qoqilishlar" ko'p bo'lganini inkor qilmayman. Lekin shunga qaramay jamoamiz yaxshi o'yin ko'rsatib peshqadamlik qilmoqda. Bu murabbiy va futbolchilarning mehnati tufayli yuzaga kelyapti. Qolaversa, omad ham biz tomonda bo'layotganini aytish joiz. Mavsum yakunida mehnatlarimizni samarasini ko'rish nasib qilsin, deb qolaman.
- "Navbahor" bilan kechgan 2ta uchrashuvda ham jamoa g'alaba bilan maydonni tark etdi. Aynan shu bahs chempionlik masalasiga aniqlik kiritdimi?
- CHempionat hali tugamadi. Qiziqarli va markaziy o'yinlar hali oldinda. Qolaversa, chempionlik uchun kurash davom etyapti. "Navbahor" ustidan qozonilgan g'alaba albatta biz uchun chempionlik yo'lida imkoniyatlarimizni oshiradi.
- So'nggi yillarda qaysi jamoa "Paxtakor" darajasiga yaqinlasha oldi?
- "Nasaf" va "Navbahor"ni aytgan bo'lardim.
- Ikkinchi davrada jamoaga kelib qo'shilgan Pavel Pavlyuchenko Eldor Syuunovga nisbatan qanchalik raqobat qila olyapti?
- Eldor Suyunov va Pavel Pavlyuchenko milliy terma jamoadagi darvozabonlar hisoblanadi. Tabiiyki, raqobat ham shunga yarasha, deb o'ylayman. Bu narsa futbolchini o'sishiga xizmat qiladi. Raqobat bo'lgani doim yoqimli.
- Qolgan guruhlarga nisbatan "Paxtakor"ga engilroq raqiblar ro'baro' keldi. OCHLda guruhdan chiqish payti keldi...
- Albatta OCHLda munosib o'yin ko'rsatishga harakat qilamiz. Bizga qaysi raqib tushishining farqi yo'q. Kim bilan, qaerda, qachon faqat g'alaba uchun maydonga chiqamiz.
- Biroz ortga qaytsak. Toshkentga 2014 yil kelishga yaqin kelgansiz. O'shanda Abramov boshchiligidagi "Lokomotiv" taklif bilan chiqqan edi. Nima uchun transfer amalga oshmagan? "Mashal"da uzoq vaqt qolib ketish faoliyatizga qanday tasir qildi?
- Bunday taklif bo'lganini eslolmayman. "Mashal"da 10 yil to'p tepdim. Yaxshi kunlar ham bo'ldi, yomon kunlar ham. O'shanda so'nggi yillarda o'zimda pasayishni sezdim va jamoadan ketishga qaror qildim. "Nasaf"dan tushgan taklifga esa ikkilanmasdan rozi bo'ldim.
- Faoliyatingizdagi qaysi uchrashuvni yodga olishni istamaysiz?
- "Jar" stadionidagi BAA bilan kechgan uchrashuvni nafaqat men balki ko'pchilik eslashni istamasa kerak.
Bosh sahifaga
459