Bu nafaqat klub boshqaruv tizimi, murabbiylar shtabida, balki jamoada ham ro'y berayotganini aytish joiz. Bilasiz, "Bunyodkor"ni uchrashuvlarda sardor sifatida Davronjon Ergashev boshlab tushayotgan edi. Endilikda esa sardorlik vazifasi Avazbek O'lmasalievga ishonib topshirildi. Biz bu borada "qaldirg'ochlar"ning yangi sardorining fikrlari bilan qiziqdik.
- "Bunyodkor" jamoasining yangi sardori etib tayinlandingiz. Sardorlik bog'ichini qanday qabul qilib oldingiz?
- Murabbiylar va jamoadoshlarim ishonch bildirib sardorlikni berishdi. "Bunyodkor"da barcha futbolchilar maydonda borini beradi. Bu esa tabiiyki jamoa sardoriga yaxshi. "Bunyodkor"dek jamoani etakchisi bo'lish katta sharaf, deb o'ylayman. Masuliyat ham nihoyatda katta. Bu tasodif emasligini, murabbiylar qarori qanchalik to'g'ri ekanligini o'yinlarimiz orqali oqlashga harakat qilaman.
- Faoliyatingizda avval ham sardor sifatida harakat qilganmisiz?
- Yo'q. Rasmiy o'yinlarda bunday holat yuz bermagan. Bilasiz, jamoalarda vice-sardor, degan narsa bor. Men hattoki, vice ham emasdim. Nasib, qilsa "Nasaf" bilan o'yin men uchun sardor sifatida debyut bo'ladi.
- Sizningcha murabbiylar bunday qarorga kelishiga nima sabab bo'ldi, jamoa ichki muhitida o'zgarish yuz berdimi?
- "Bunyodkor"da ichki muhit har doim yaxshi bo'lib kelgan. Bundan keyin ham yaxshiligicha qoladi. Nima uchun bunday qarorga kelishgani murabbiylarga ayyon.
- Mavsum startidan keyin "Bunyodkor"ni taniy olmay qoldik...
- Dastlabki 5-6 turni yaxshi o'tkazdik. Muhim g'alabalar qo'lga kiritildi. Lekin aytganingizdek ko'p ochkolarni yo'qotdik. Mana endi jamoamiz barqarorlashib bormoqda. Qolgan uchrashuvlarda maksimal ochko to'plash uchun bor kuchimizni ishga solamiz.
- Oldinda Qarshida "Nasaf" bilan uchrashuv kutmoqda. O'tgan safar mo'jiza mag'lubiyatdan qutqargandi...
- Hech qaysi jamoa bilan oson bo'lmaydi. SHuning uchun oldinda qizg'in to'qnashuvlar bisyor. Xudo xohlasa, 24 sentyabr oqshomida butun vujudimiz g'alabaga qaratilgan bo'ladi. Qolganini vaqt ko'rsatadi. O'z o'yinimizni ko'rsatishimiz kerak. SHoshilmang, biz hali barchaga bosh og'riq bo'la olamiz. SHaxsan men bunga ishonaman.
- Aleksandr Krestinin nimani o'zgartirdiki, natijalar sekin-asta o'zgarmoqda?
- O'yin uslubi o'zgardi, biz endilikda hujumga etibor bermoqdamiz. O'yinni raqib maydonida quryapmiz. Vaziyatlar ko'p yaratmoqdamiz. Natija ham keladi, albatta.
Bosh sahifaga
466