Uchrashuv asosiy vaqtida hisob ochilmadi. Ekstra-taymlarda esa SHerzod Esanov dubl qayd etib, termani chorak finalga olib chiqdi. Uchrashuvdan so'ng olimpiyachilar ustozi Timur Kapadze matbuot anjumanida ishtirok etdi.
- O'yin haqida
- Hamma yurtdoshlarimizni g'alaba bilan tabriklayman! Qiyin uchrashuv bo'ldi. Asosiy vaqtda yutish niyat bor edi, ammo qiyinchilikka uchradik. Ekstra-taymlarda bo'lsa-da, eng muhimi, g'alaba qozondik. Endi keyingi o'yinga tayyorgarlik ko'ramiz.
Musobaqada oson o'yinning o'zi yo'q. Indoneziya bizga qarshi jiddiy kurash olib bordi. Ehtimol, vaziyatlarimizdan unumli foydalanganimizda masala asosiy vaqtda hal etilardi.
Jamoa o'yini Osiyo Kubogida saralashidagi jamoanikidan farq qilyapti. Buning sababi nimada?
- To'g'ri takidladingiz. Har bir uchrashuvda imkoniyatlarimiz ko'p bo'lyapti, ammo foydalanishda qiynalyapmiz. Balki ruhiy taraflama muammoga uchrayotgandirmiz. Xotirjamroq o'ynashimiz kerak. Buning ustida ishlayapmiz.
Umid qilamanki, keyingi uchrashuvlarda yo'q imkoniyatlardan ham unumli foydalanib keta olamiz. Ehtimol, saralash bahslarida uyimizda o'ynaganimiz bizga foyda bergandir. Havo va maydon holati ham o'zimizdagidan farq qilishini unutmaslik lozim. Lekin o'ylaymanki, yigitlar vaziyatlardan foydalana olmaslik holatlaridan chiqib ketishadi.
- Ko'plab imkoniyatlarni ko'kka sovuryapmiz. Yigitlarga qandaydir aniq ko'rsatmalar berish kerakka o'xshaydi. Bu borada qanday ish olib borasiz?
- Bunday turnirlarda birinchi navbatda tiklanish jarayoni muhim. O'yinlarda katta kuch sarflanyapti, ob-havo ham tasirini o'tkazmoqda. Indoneziyadan kuchliligimizni bilardik, ammo ular yaxshi himoyalanishdi. Hozirgi asosiy vazifam – futbolchilarimizni tiklash. Keyin o'yinga tayyorgarlik ko'rish uchun bizda 1 kun vaqt bo'ladi. Albatta, sariq va qizil kartochkalar bilan bog'liq yo'qotishlar bor. Tiklanish jarayoni bugundan, hozirdan boshlandi. Albatta, keyingi bahsgacha o'zimizga kelib olamiz.
- Jamoangiz bugungi o'yindan oldin penaltilar seriyasiga tayyorgarlik ko'rganmidi?
- Bugun penaltilar seriyasiga alohida tayyorgarlik ko'rganimiz yo'q. Yigitlar doim mashg'ulotlardan so'ng buning ustida alohida ishlashadi.
Avvalroq O'zbekiston U-23 termasi chorak finalda qaysi terma bilan o'ynashi haqida xabar berilgan edi.
Bosh sahifaga
249