Istaymizmi yoki yo'q O'zbekiston olimpiya terma jamoasining bugungi Janubiy Koreyaga qarshi kechadigan yarim final uchrashuvini 1994 yilgi Osiyo o'yinlariga bog'layveramiz.
O'shanda turnirning yarim finalida Anatoliy Bishovec boshchiligidagi Janubiy Koreya terma jamoasi 1:0 hisobida taslim qilingan. Garchi raqiblar bir necha bor darvozamizni ishg'ol qilishga yaqin kelganiga qaramay darvoza to'sini va Yuriy SHeykinning seyvlari bunga yo'l qo'ymagandi. O'yindagi yagona golga esa Azamat Abduraimov mualliflik qilgan.
Golning videosini tomosha qilish uchun BU ERGA o'ting.
"Oradan deyarli 30 yil o'tib Osiyo o'yinlarida terma jamoamiz yarim finalga chiqdi va ular bugun Janubiy Koreyaga qarshi o'ynaydi. To'g'ri hozir milliy emas olimpiya terma jamolari ishtirok etmoqda. 29 yil oldin bizga qiyinroq edi. CHunki o'shanda xalqaro maydondagi ilk rasmiy musobaqamizda qatnashganmiz. Janubiy Koreya terma jamoasi 1994 yil AQSHda bo'lib o'tgan Jahon chempionatida ishtirok etib qaytgandi. Ularning o'yinlarini ko'rib koreyslar bizdan kuchliroq ekanligini bilib turgandik.
Bu safar esa hammasi boshqacha. Olimpiya terma jamoamizning Janubiy Koreyadan kam joyi yo'q. Kapadze jamoasi Osiyo o'yinlariga yaxshi tayyorgarlik ko'rgan. Futbolchilar uzoq yo'lni bosib o'tishdi. Xalqaro o'yinlarda tajriba to'plashdi. SHu bois jamoalarning imkoniyatlarini teng, deb o'ylayman. Ishonamanki, terma jamoamiz g'alaba qozonadi va 29 yil avvalgi kabi finalga chiqishadi. Ularga omad tilaymiz", - deydi Azamat Abduraimov.
Abdulaziz Iskandarov
Bosh sahifaga
182