Qosimov jamoasining Superligada ham, OCHLda ham ishlari yurishmayapti. "Navbahor" esa 3 ta frontda ham ishtirokini davom ettiryapti. Jamoalar bugun Kubok bahsida final yo'llanmasi uchun bellashishadi.
 OKMK | O'zbekiston kubogi . 3-tur 19/10/2023, 18:00 - : - Boshlanmadi |  Navbahor |
Joriy mavsumdagi o'yinlar
Ushbu bahs jamoalarning mavsumdagi 3-o'yiniga aylanadi. Superliga doirasida o'tkazilgan 1-davradagi bahsda "konchilar" mezbon maqomida 2:1 hisobida g'alabaga erishgan – Jamshid Iskanderovning penaltidan urgan golidan so'ng SHahboz Jo'rabekov o'z darvozasini ishg'ol qilgan va Ruben Sanches to'p kiritgan edi. Namanganda o'tkazilgan 2-davradagi o'yinda esa durang (0:0) natijasi qayd etilgan.
Xalqaro maydondagi ishtirok
Ikki jamoa ham joriy mavsum OCHLda ishtirok etmoqda. Ikki turdan so'ng jamoalarning natijalari har xil. "S" guruhidan joy olgan OKMK dastlabki ikki turda mag'lubiyatga uchradi va guruhdan chiqish imkoniyatlarini keskin kamaytirib yubordi. Birinchi turda mehmonda "Al Ittihod"ga 0:3 hisobida mag'lub bo'lgan olmaliqliklar, ikkinchi tur bahsini o'z maydonida o'tkazdi. Olmaliqda bo'lib o'tgan uchrashuvda OKMK Iroqning "Eyr-Fors" jamoasiga mag'lub bo'ldi (1:2).
"Navbahor"da esa teskari holat. Samvel Babayan shogirdlari CHempionlar Ligasi bahslarida mag'lubiyat nimaligini bilmay kelishmoqda. Birinchi turda "Al Hilol"ga qarshi uchrashuvda sensacion tarzda durang qayd etgan namanganliklar, ikkinchi turda "Mumbay Siti" jamoasini 3:0 hisobida taslim etishdi. SHunday qilib, ikki turdan so'ng "Navbahor" 4 ochkoga ega bo'lsa, OKMKda ochkolar soni 0 ga teng.
Ko'p tanqid qilinayotgan ikki murabbiy
Joriy mavsum ikki jamoaga chempionat bahslarida barqarorlik etishmayapti. OKMK turnir jadvalida 36 ochko bilan 5-o'rinni egallab turgan bo'lsa, "Navbahor" 40 ochko jamg'arib 2-o'rinni band etib turibdi. "Metallurg", "Andijon", "So'g'diyona" kabi jamoalarga qarshi uchrashuvlarda ochko yo'qotgan "lochinlar" chempionlik bahsidan deyarli chiqib ketishgan edi, ammo so'nggi turda "Paxtakor"ning ochko yo'qotishi sabab jamoa yana chempionlik poygasiga qaytdi. Mavsum hali yakunlanmasidan ayrim "Navbahor" muxlislari jamoa bosh murabbiyi Samvel Babayanni istefoga chiqishini talab qildi.
OKMK bosh murabbiyi Mirjalol Qosimovning esa joriy mavsumda omadi yurishmayotgani yaqqol ko'zga tashlanmoqda. Kuchli tarkibga ega bo'lishiga qaramay, Qosimov jamoasi Superligada 5-o'rinda va sovrinli o'rinlardan joy olishi deyarli ilojsiz bo'lib qoldi. OCHLda esa OKMK o'zidan ancha kuchsiz bo'lgan Iroq jamoasiga mag'lub bo'ldi. OKMKning so'ngi umidi O'zbekiston Kubogi bo'lib qolmoqda.
Muallif taxmini
O'yin ekstra taymlargacha davom etsa kerak. Hozirgi holatda "Navbahor"da kichik ustunlik bo'lishi mumkin, ammo Qosimov yigitlari joriy mavsumdagi medallar uchun so'ngi imkoniyatini boy berishni istamaydi.
Imkoniyatlar: 50% – 50%
Abdulvosit Bektemirov
Bosh sahifaga
256