"O'yindan avval "Bunyodkor"ni o'rganib chiqqan edik va bugun yaxshi o'yin namoyish etdik. O'yinni nazorat qildik, lekin natija bizning foydamizga bo'lmadi. Qizil kartochka ham bizga ustunlik berdi. Ammo biz hisobni yiriklashtira olmadik. Raqib o'yinning oxirgi qismida hujumga zo'r berishi aniq edi. G'alabani qo'ldan chiqardik. Mayli, shunday hisob qayd etildi. Xatolar ustida ishlaymiz va ushbu vaziyatni o'rganib chiqamiz", – dedi Kapadze.
- "Olimpik" 70 daqiqa o'yinni nazorat qildi. Keyin esa o'yin tempini tushirib yuborish natijasida raqibga hujumga o'tishga imkoniyat berdi. Ushbu holat asosiy tarkib futbolchilarining terma jamoadan qaytganidan keyingi charchoq alomatlari bilan bog'liqmi? Sababi "Olimpik" tarkibidagi terma jamoaga jalb etilgan futbolchilar va klubda qolgan futbolchilarning jismoniy holatidagi farq sezilib qoldi...
- Biroz charchoq alomatlari bor, lekin yigitlar baribir yaxshi o'yin namoyish etishdi. Vaziyatlarimizdan foydalanganimizda masala ijobiy hal bo'lardi. "Bunyodkor" ham yaxshi jamoa va ular buni isbotlashdi. Ushbu holat ham biroz tasir o'tkazdi, ammo barchasi o'zimizning qo'limizda edi.
- "Olimpik" futbolchilari joriy mavsum tez-tez terma jamoalarga jalb etilmoqda. Bu futbolchilarga katta yuk bo'lib qolmaydimi? Keyingi mavsum Osiyo Kubogi kutib turibdi. Osiyo Kubogiga qadar tayyorgarlik rejasini ishlab chiqdingizmi?
- Biz faqat FIFA kunlarida yig'inlar o'tkazmoqdamiz. Men hech qanday muammo ko'rmayapman. Biz rejadan tashqari Osiyo o'yinlarida ishtirok etdik xolos. Oldinda faqat dekabr oyida FIFA kunlari bor. Associaciya va PFL bilan kelishgan holda tayyorgarlik rejasini tuzib chiqamiz. Ushbu jarayonda hammasi nazoratimiz ostida va muammoga duch kelmaymiz deb o'ylayman.
Bosh sahifaga
157