Virtual futbol real hayotdagi ishlarga to'g'ridan-to'g'ri tasir o'tkazgan holat yuz berdi. SHu kunlarda uning oqibatida katta janjal kelib chiqdi. Hammasi 22 fevral kuni boshlandi, "Aston Villa" bosh murabbiyi Din Smit "Lester"ga boy berilgan (1:2) o'yindan keyin jaxl otiga mingandi. Ijtimoiy tarmoqlarda yarim himoyachi Jek Grilish bu o'yinni o'tkazib yuborishi haqida malumotlar tarqalib ketdi.
"Ijtimoiy tarmoqlarda Grilish o'ynamasligi haqida malumotlar aylanib yurgandi. Agar bu malumot "klub ichidan" tarqatilgan bo'lsa, men albatta o'sha insonni topaman va jazolayman. Bunday holat meni qoniqtirmaydi. Men to'liq optimistman va Grilish navbatdagi o'yinga, "Lids" bilan uchrashuvgacha qaytishiga umid qilaman, lekin yakuniy qarorni shifokorlarimiz beradi", — dedi Smit.
Grilishning jarohati borasida malumot qaerdan tarqalib ketdi?
Keyingi kuniyoq "Villa" mediklari astoydil yashirishga uringan Grilishning jarohati qanday fosh bo'lgani malum bo'ldi. "Aston Villa"ning bazi futbolchilari va xodimlari "Lester" bilan o'yindan oldin deyarli sinxron ravishda o'zlarining fentezi-jamoalari tarkibidan yarim himoyachini chiqarib yuborishgan. Virtual liganing sinchkov kuzatuvchilari bo'lmaganida klub vakillarining rejasi ish bergan va bu holatga ortiqcha etibor qaratilmagan bo'larmidi?!
APL fentezisi juda mashhur va u erda Premer-liga klublari vakillari ham o'z jamoalariga ega. "Aston Villa"da futbolchilardan Mett Targett, Konor Xurixeyn va Nil Teylor ligada ro'yxatdan o'tishgan. Aynan ular "Lester" bilan to'qnashuvdan avval Grilish bilan "xayrlashgan".
Endi klub ushbu futbolchilarga virtual ligada ishtirok etishni rasman taqiqlab qo'ydi. Katta ehtimol bilan yaqin vaqtlarda APLning boshqa klublari ham shunday yo'l tutadi.
Qiziq tomoni, Grilish liganing ko'plab ishtirokchilari tarkibida bo'lgan. Raqib kuchli bo'lgan bo'lsa-da, futbolchi hech bo'lmaganda "Aston Villa"ning 2019 yil noyabr oyidan buyon birorta uchrashuvini o'tkazib yubormagani va ancha yaxshi statistikasi uchun (mavsumning 22 uchrashuvida 6ta gol urdi va 12 samarali uzatma etkazib berdi) o'yinchilarning tanloviga sabab bo'lgan. Hozir u fentezida "bozori chaqqon" yarim himoyachilar ichida to'rtinchi pog'onada bo'lib turibdi.
Mavzu shu qadar ommalashdiki, o'yindan keyingi matbuot-anjumanlaridan birida bu borada Xosep Gvardiolaga ham savol berishdi. Jurnalistlar murabbiy malumotlar bu tarzda tashqariga chiqarib yuborilishiga munosabatini so'rashdi. Pep javob berdi: "Aston Villa"da bo'lgan ishlar haqida eshitdim. Futbolchilar turli o'yinlarni sevib o'ynashlarini bilardim, lekin kechagi kungacha FPL haqida eshitmagan ekanman. Bazan futbolchi bo'lajak turga tarkib tuzayotib do'stlari bilan maslahatlashadi va bazi ommalashmasligi zarur malumotlarni ham ishlatadi. O'ylashimcha bu etika qoidalariga ham, professionallikka ham to'g'ri kelmaydi. Ammo men buni nazorat qila olmayman".
APL fentezi-ligasi nima?
Bu rasmiy virtual mavsum, APL sayti uni 2002 yilda ishga tushirgandi. Qoidalar oddiy, tushunarli va yillar davomida o'zgarmaydi: virtual byudjetga 15 futbolchidan iborat jamoa tuzish va ularning real hayotda muvaffaqiyatli ishtirokiga umid qilish zarur. Turlar orasida 3tagacha o'yinchini almashtirish mumkin.
Yakuniy qaror uchun dedlayn — turning birinchi uchrashuvidan 90 daqiqa oldin. O'z vaqtida APL o'zining fentezisining "piariga" jiddiy etibor qaratgan. Saytda muntazam ravishda professional skautlardan maslahatlar, matnli va video-tahlil, podkast, "tvitter" va hozir u erda taxminan 8 million nafar ishtirokchi bor. Ularning orasida — APL futbolchilari yoki mashhur ishqibozlar ham bor. Misol uchun, mashhur shaxmatchi Magnus Karlsen.
Yana bir qiziq holat, Grilish bilan bo'lgani kabi holatlar avval ham yuz bergan. 1 fevral kuni Endi Robertson jamoasidan Sadio Maneni olib tashalagan, oradan ikki kun o'tib esa u "Brayton"ga qarshi maydonga tushmagan. 20-turda "Lester" vakillari Ues Morgan va Xamza CHouduri tarkiblaridan Jeymi Vardini chiqarib yuborishadi. Angliyalik hujumchi shundan keyin to'rtta turda maydonga tushmagan.
Britan OAV taxminlariga ko'ra, klublar muammo jiddiylashib borishidan havotirda. Ular buyog'iga boshqa futbolchilarning ham akkauntlari kuzatib borilishi va tahlil qilinishidan tashvishda. Ehtimoliy qarorlardan biri — klublar futbolchilaridan tarkiblariga jamoadoshlarini olmaslikni yoki butkul virtual o'yinda ishtirok etmaslikni talab qiladi.
Nozima Zaripova tarjimasi
Bosh sahifaga
274