Jahon chempionatlaridagi ishtirok
Kanadalik o'smirlar o'z tarixida etti marotaba ushbu yosh mintaqasidagi mundialda ishtirok etib, biror marotaba guruh bosqichidan nariga o'ta olishmagan. Bundan tashqari, ular o'z tarixida davomida hali biror o'yinda g'alaba qozonishning uddasidan chiqmagan.
Saralash bosqichi
Musobaqani "F" guruhida boshlagan Endryu Oliveri shogirdlari Trinidad Tobago (3:2), Barbados (2:0) va AQSH (0:1) bilan kurash olib, pley-off yo'llanmasini qo'lga kiritdi. Nimchorak finalda Gaitini 3:0 hisobida taslim etgan kanadaliklar chorak finalda Puerto-Rikoni xuddi shu hisobda mag'lub etdi. Biroq jamoa yarim finalda AQSHga 0:2 hisobida imkoniyatni boy berdi. SHunga qaramay, Kanada CONCACAF turniri orqali mundial yo'llanmasini qo'lga kiritgan to'rt jamoadan biri bo'ldi.
Mundialga tayyorgarlik
Kanada jahon chempionatiga tayyorgarlik doirasida faqatgina Janubiy Amerika jamoalariga qarshi o'rtoqlik uchrashuvlari o'tkazdi. Jumladan, Braziliyada ushbu mamlakat o'smirlari bilan ikki marotaba to'nash kelib, 1:3 va 0:5 hisoblarida mag'lubiyatga uchragan bo'lsa, bir hafta ilgari Indoneziyada Argentinaga 1:2 hisobida engildi.
Tarkib
"Qizillar" ustozi Endryu Oliveri mundialga quyidagi futbolchilarni chaqirdi:
Darvozabonlar
Abraham Nataniel (Toronto), KANTOROVICH Dominik (Toronto), OBRAYEN Aleksandr (Toronto).
Himoyachilar
RIGOPULOS Teo (Toronto), DE MONTINI Ge (Montreal), OMEZ Ximeri (Toronto), STEFANOVICH Lazar (Toronto), FONG Aidan (Vankuver), CHUKVU Richard (Toronto), FUNG Viktor (Inter Mayami, AQSH), GODIN Eten (Montreal), AKLIL Lino (Monpele, Franciya).
Yarim himoyachilar
BELLO Alessandro (Montreal), BADVAL Jivan (Vankuver), IGBINOBARO Filipp (Toronto), LONDONO Tayler (Toronto).
Hujumchilar
TAXID Tarik (Vankuver), KLYUKOVSKIY Antoniy (Pogon SHecin, Polsha), TAVERNE Kevon (Forge), POP Erik (Karlsrue, Germaniya), OZIMEK Lukas (Toronto).
Joriy musobaqadagi ishtirok
Kanada guruh bosqichining dastlabki turida Ispaniyaga 0:2 hisobida imkoniyatni boy berdi. Uchrashuv to'liq evropaliklar nazorati ostida o'tdi. Bunga shimoliy amerikaliklarning 38-daqiqada bir kishi kam bo'lib qolgani ham sabab bo'ldi. raqibga nisbatan qo'pol o'ynab, maydondan chetlatilgan yarim himoyachi Alessandro Bello O'zbekistonga qarshi uchrashuvni o'tkazib yuboradi.
Bellashuv davomida Kanada o'smirlari to'p nazorati borasida atigi 23% ko'rsatkich qayd etgan. Raqib darvozasi qarshisida 2 marotaba xavfli vaziyat yuzaga keltirgan, biroq birorta aniq zarba yo'llay olmagan.
Ispaniyaga qarshi o'yinda jamoaning yagona zarbasi 51-daqiqada Tarik Tahid tomonidan ijro etilgan. O'ng qanotdan boshlangan qarshi hujumni natijasida markazdan to'pni qabul qilib olgan 7-raqamli forvard mo'ljalni noaniq oldi.
Kanadalik himoyachilar bo'ydor bo'lishiga qaramay, ko'p marotaba ikkinchi qavatdagi kurashda raqibga imkoniyatni boy berdi. O'tkazib yuborilgan birinchi gol ham bosh bilan urildi. Mark Giyu qanotdan oshirilgan to'pni darvoza to'ridan o'rin olishini taminladi. Ikkinchi golda esa ispanlar qisqa paslar orqali raqib jarima maydoniga kirib bordi, Kuim Junent mukammal zarba bilan hisobni ishonchli ko'rinishga keltirdi. Ayni damda Kanada guruhda 3-o'rinni egallab turibdi.
O'zbekistonga qarshi o'yin oldidan Kanada U-17 murabbiyi qanday fikrda?
"Ilk uchrashuvdagi mag'lubiyatni qabul qilish futbolchilar uchun oson bo'lmadi. Qolaversa, bu yigitlar jahon chempionatida ilk marotaba maydonga tushgandi va o'zlari kutgan natijaga erisha olmadi.
Mag'lubiyatga qaramay, ularda umid etarli, chunki keyingi ikki bellashuvda g'alaba qozona olsak, keyingi bosqichga chiqish imkoniyatiga ega bo'lamiz.
Ispaniyaga qarshi bahsdan farqli o'laroq, O'zbekistonga qarshi o'yinga tayyormiz. Biroq mazkur to'qnashuv qiyin o'tadi. Sababi, har ikkala jamoaga g'alaba zarur va bunga erishish uchun jamoalar bor kuchini sarflaydi", dedi 42 yoshli mutaxassis.
Eslatib o'tamiz, Kanadaga qarshi bellashuv bugun O'zbekiston vaqti bilan 17:00da start oladi. Mazkur o'yinda O'zbekiston termasi to'liq oq libosda, darvozabon esa to'q sariq libosda harakatlanadi.
Uchrashuvni boliviyalik hakamlar brigadasi boshqarib boradi. Bosh hakam — Ivo Mendez, unga qanotlarda hamyurtlari Alberto Karlos va Rojer Apaza yordam beradi. To'rtinchi rasmiy hakam vazifasi esa Toriq Munirga (Indoneziya) topshirilgan.
Bosh sahifaga
127