Uning uchta fikri orqali Mario hali ham dunyoning eng zo'ri ekanligiga shubha qilmasligini anglashingiz mumkin.
“Bir kuni Krishtianu Ronalduning oldiga borib: “Men sizdan ko'ra yaxshiroq futbol o'ynayman”, dedim.
“Dunyoda mendan biroz kuchliroq bo'lgan yagona futbolchi bor. Bu – Lionel Messi. Qolganlarning hammasi orqada";
"Ueyn Runi albatta yaxshi, lekin u Manchesterdagi eng yaxshi futbolchi emas."
Ha, bularning barchasini Mario Balotelli aytgan. Hozir u 33 yoshda. U uzoq vaqtdan beri top-klublar radaridan g'oyib bo'lgan, biroq uning o'zini qadrlash tuyg'usi so'nmagan. Ekcentrik futbolchi Italiya termasining 2024 yilgi Evropa chempionati saralashidagi o'yinlariga quyidagicha munosabatda bo'ldi:
"Agar menda jarohatlar bo'lmasa, men hali ham Italiyaning eng yaxshi hujumchisiman. Raspadori va Skamakka Ukrainaga qarshi o'yinda yo'q bo'lib qolishdi. Ikkisi darvozaga necha marta zarba berishdi? Ikkitami? Jarohatimdan tuzalgach, yana terma jamoada o'ynamoqchiman. Men har doim terma jamoadan chaqiruv olishga umid qilaman. Spalletti bilan bir necha bor uchrashdim va bizning munosabatlarimiz yaxshi”.
Jakomo Raspadori va Janluka Skamakka, albatta, Roberto Badjo va Kristian Veri emas. Va hatto Luka Toni va Alberto Jilardino ham emas. Evro-2024 saralashida bu juftlikning har biri oltitadan o'yin o'tkazib, faqat bittadan gol urishga muvaffaq bo'ldi. Statistikalar, yumshoq qilib aytganda, ajoyib emas.
Raspadori ham, Skamakka ham Ukraina darvozasi tomon bittadan noaniq zarba berishdi. Ikkalasiga ham ushbu natijagaga erishishi uchun 45 daqiqa vaqt kerak bo'ldi: ikkinchisi tanaffusda birinchisini almashtirdi.
Biroq Balotelli endi Evro-2012 yarim finalida Germaniyani mag'lub etgan va Italiyani qita chempionatining hal qiluvchi o'yiniga olib chiqqan futbolchi emas. U oxirgi marta terma jamoada 2018 yilda o'ynagandi. Uning oxirgi yaxshi jamoasi esa 2019 yilda o'ynagan "Marsel" edi. U so'nggi bor TOP-5 chempionatida 2020 yilda "Monca" safida "Lacio"ga gol urgan.
SHundan so'ng u B Seriyadagi "Monca", Turkiyaning "Adana Demirspor", SHveycariyaning "Son" jamoalarida o'ynadi va nihoyat, shu yilning sentyabr oyida yana Turkiyaga qaytdi.
SHu natijalaridan so'ng "Super Mario" termaga chaqirilishga haqlimi?", degan savol tug'iladi. SHunday ekan, Mario va terma jamoadagi hozirgi hujumchilarning bu yilgi statistikasini keltirib o'tamiz.
Balotelli "Adana Demirspor" tarkibida 5 ta o'yinda (o'rtacha 36 daqiqa maydonda harakat qildi) 3 ta gol urgan (har 61 daqiqada bitta gol), darvoza tomon 11 ta zarba yo'llagan, shundan 5 tasi aniq;
Raspadori "Napoli" safida 12 ta o'yinda (maydonda o'rtacha 59 daqiqa harakat qildi) 3 ta gol urgan (har 238 daqiqada bitta gol), darvoza tomon 35 ta zarba bergan (shundan 14 tasi aniq), 2 ta golli uzatma;
Skamakka "Atalanta" uchun 9 ta o'yinda (maydonda o'rtacha 56 daqiqa harakat qildi) 5 ta gol urgan (har 100 daqiqada bitta gol), darvoza tomon 26 ta zarba bergan (shundan 11 tasi aniq), 1 ta golli uzatma.
Balotelli kamdan-kam o'ynaydi, lekin maydonga tushsa, natija bera oladi. U buni Skamakka va ayniqsa, Raspadoridan ko'ra ancha yaxshi bajaradi. Farq chempionatlarning darajasida: Turkiya ligasining eng yaxshi to'purari Edin Jeko allaqachon 12 o'yinda 10 ta gol urgan bo'lsa, "Inter"da A Seriyaning so'nggi mavsumida atigi 9 ta gol urgan (ulardan 3 tasi penaltidan).
Marioning statistikasi hurmatga loyiq, ammo Turkiya chempionati Italiyanikidan ancha ortdaligi aniq. Bundan tashqari, Baloning terma jamoaga qaytishiga qarshi yana ikkita muhim omil bo'lishi mumkin:
1. Jamoadoshlar o'z hujumchilarini tanqid qilgan futbolchini qanday kutib olishadi?
2. Oxirgi uch yil ichida Balotelli jarohatlar tufayli 176 kunni(!) o'tkazib yubordi, yani deyarli olti oy. Bu juda ko'p emasmi? Yana bir jarohat bo'lsa, u formasini tiklashga ulguradimi?
Terma jamoa unga muhtojligini elon qilgan Mario hali ham o'tmishda yashayotganga o'xshaydi. U o'zini hali ham Evro-2012da porlagan, "Manchester Siti" uchun APLda gol urayotgan yoki hech bo'lmaganda "Nicca"da ajoyib faoliyat olib borayotgan futbolchi deb o'ylamoqda. Afsuski, endi unday emas. Uning bayonotlari hali ham ommaviy axborot vositalarini portlatib yuboradi, ammo, afsuski, ular endi mantiqqa zid.
Bosh sahifaga
214