FAKTLAR. "Neftchi" 8 yildan so'ng kuchli beshlikka qaytdi. Superligada so'nggi bor qachon o'zbekistonlik futbolchi to'purar bo'lgan?

Superliganing o'tgan mavsumida nafaqat turnir jadvalida, balki to'purarlar poygasida ham raqobat qizg'in ruhda kechdi. 26-turdan o'rin olgan "Paxtakor" - "Bunyodkor" uchrashuvigacha CHeran, Xebay, Nimeli hisobida bir xil 12ta gol bor edi. Aftidan albaniyalik va liberiyalik hujumchilar CHeran gegemonligiga barham berishi mumkin edi. Ammo engilmas Dragan "Bunyodkor"ga 13 golini urdi va ketma-ket beshinchi yil "oltin butsa" egasiga aylandi. Keling to'purarlar mavzusiga oid ayrim malumot va faktlarga to'xtalib o'tsak. 

— Superliga tarixida ilk bor bir futbolchi qatorasiga 5 yil to'purarga aylandi. Bu borada CHeran o'tgan yilgi rekordini yangiladi. 

— Superligada so'nggi marotaba 2017 yil o'zbekistonlik futbolchi to'purarlar ro'yxatida birinchi o'rinni egallagan. 2017 yilgi mavsumda Marat Bikmaev 27ta gol bilan etakchi bo'lgan. 

— Dragan CHeran Superliga to'purarlari tarixidagi 6 legioner hisoblanadi. Xorijlik futbolchilarning "snayper" bo'lishini tarixda ilk bor 2009 yil Rivaldo boshlab bergan. 2009 yilgacha birinchilikni o'zbekistonlik futbolchilar hech kimga bermagan.

— O'zbekiston chempionati antirekordi takrorlandi - chempionat to'purari 13ta gol urdi. 2010 yilda Alisher Xoliqov va Nosir Otaqo'ziev ham 13tadan gol urib to'purar bo'lishgandi.  

— Dragan CHeran Superligada 2018 yildagidan keyingi eng kam golini urdi. Hujumchi o'sha mavsumni 3 ta gol bilan yakunlagan.

Endi esa jamoalarning mavsumdagi natijalari, egallagan o'rinlariga oid faktlarga to'xtalamiz. 

— "Neftchi" jamoasi Superligada 8 yildan so'ng kuchli beshlikka qaytdi. Farg'onaliklar so'nggi bor 2015 yilgi mavsumda Murod Ismoilov boshchiligida 5 o'rinni olgandi.

— "Andijon" Superligada 2010 yilgi natijasini takrorladi. "Bugutlar" o'sha mavsum Amet Memet ustozligida turnir jadvalini 7 o'rin bilan yakunlagan. 

— "So'g'diyona" so'nggi 5 yildagi eng yomon natijasini qayd etdi. Jizzaxliklar oxirgi marotaba 2018 yil 11 o'rinni egallagan. 

— Eng katta sakrashni "Surxon" amalga oshirdi. Arslanov va Tokov shakllantirgan jamoa 11 o'rindan 6 o'ringa ko'tarildi va 2019 yilgi natijasini takrorladi.

— Katta pasayish "Qizilqum"da bo'ldi. Jamoa o'tgan yili 5 o'rindan bu yil 12 o'ringa sho'ng'idi. Navoiyliklar so'nggi marotaba 2019 yil 13 o'rindan joy olgan va Superligada qolgandi.