Mazkur uchrashuvda Muhammadali G'iyosov va Islom Kenjaboevning gollari navoiyliklarga g'alaba keltirdi. Uchrashuvdan so'ng Muhammadali G'iyosovning fikrlari bilan qiziqdik.
"Raqib safida yaxshi futbolchilar borligini va bizga oson bo'lmasligini bilar edik. Jamoamizni qo'llab-quvvatlagan Navoiy xalqiga minnatdorchilik bildiraman. Qiyin mavsum o'tganiga qaramasdan, oldimizga qo'yilgan vazifani bajardik. Yozda "Qizilqum"ni Superligada saqlab qolish yo'lida jamlandik. Barchamiz bir maqsad yo'lida harakat qildik. Muxlislar oldida uyalib qolmadik.
O'zimga kelsak, oxirgi paytlarda ko'pchilik ijobiy fikr bildirmoqda, lekin mukammal emasligimni, kamchiliklarimni bilaman. Katta maqsadlarim bor. Ularga erishish uchun har kuni ishlashim, to'xtab qolmasligim kerak.
"Olimpik" bilan Superligaga chiqqanimiz va kechagi g'alabani taqqoslab bo'lmaydi. Ikkisi ham tarixda qoladigan natija bo'lgan. Mazkur jarayonlarni eslashning o'zi yoqimli hissiyotlarni beradi.
Keyingi rejalarim haqida aniq bir gap ayta olmayman. Bir qarorga kelganim yo'q, lekin legionerga aylanish harakatidaman", – deydi Muhammadali G'iyosov.
Abdulaziz Iskandarov yozib oldi
Bosh sahifaga
220