O'zPFL va Turkiya Klublar birligi hamkorlikda tashkil qilgan seminar doirasida 20 nafar o'zbek klublari vakillari turk futboli infratuzilmasi, “Fenerbahche” va “Galatasaroy” klublarining tijoriy va skauting (o'yinchilar selekciyasi) sohalaridagi faoliyati bilan yaqindan tanishish imkoniyatiga ega bo'lishdi.
“Qo'qon-1912” futbol klubi vice-prezidenti Akramjon Mamadaliev mazkur seminarda olingan yangiliklar xususida o'z fikrlarini bildirdi:
- Turkiyaga qilgan safarimiz barchamiz uchun foydali bo'ldi. U erda Evropa darajasidagi futbol klublari qanday bo'lishini, u klublarda ish qanday tashkil qilinganligini o'z ko'zimiz bilan ko'rdik. Men uchun u erda ayniqsa, o'yin uchun oddiy chiqariladigan chiptalar o'rni maxsus kartalarga almashtirilgani, birovni chiptasi/kartasi bilan boshqa odam stadionga kira olmasligi, umuman shu borada yo'lga qo'yilgan tartiblar yangilik bo'ldi. Bu tizim muxlislarning xavfsizligi va stadionga kirganda muammolarga duch kelmasiligiga sharoit yaratadi. Muxlis uyida o'tirgan holda o'yinga chipta olib, o'zi hohlagan vaqtda bemalol borib o'z joyini egallaydi. Ushbu muxlis kartasida stadionga kirgan har bir muxlisning personal malumotlari joylashgan bo'ladi. Yana bir qulayligi mazkur kartani ko'chadagi do'konlardan savdo qilishda, umuman hamma joyda ishlatish mumkinligi ham juda ajoyib. Bizda ham chiptalar savdosi elektron tarzda tashkil etilsa, muxlislar to'g'risida malumotlar bazasi shakllantirib borilsa, yaxshi bo'lardi.
Yana bir jihat shundan iboratki, turk klublarida yo'lga qo'yilgan skauting tizimi menga juda yoqdi. Bizning klublarda ham video roligini ko'rib chetdan futbolchi olishni o'zi bilangina cheklanmasdan, jamoaga taklif qilinadigan har bir futbolchi bilan alohida shug'ullanadigan klub skauting tizimi tashkil qilinsa jamoalarimizga ancha foydali bo'ladi, deb o'ylayman. Klubda chin manodagi skautlar faoliyat yuritishi – mavsum davomida ham tarkibdagi futbolchilarning o'yini statistik tahlili shakllantirib borilishi, qaysi futbolchi mavsumni qanday barqarorlikda o'tkaza olgani bo'yicha malumotlar ombori yaratilishi, asosiysi – klubga taklif etiladigan o'yinchilarni kuzatish ancha oldindan boshlanishiga olib keladi, - dedi Akramjon Mamadaliev.
Bosh sahifaga
93