Intervyu. Pavel Bugalo: "O'tkir Yusupov terma jamoada birinchi raqamli darvozabon. Lekin..."

O'zbekiston terma jamoasi Osiyo Kubogiga mezbonlik qiladigan Qatarga otlandi

Qatarga yo'l olgan tarkibga nazar tashlar ekanmiz har bir poziciyada 2-3 nafardan futbolchi borligiga guvoh bo'lishimiz mumkin. Xususan, darvoza chizig'ida O'tkir Yusupov, Botirali Ergashev, Abduvohid Nematov  joy oldi. Terma jamoamiz darvoza chizig'ida raqobat qay darajada? SHu va boshqa savollar bilan O'zbekistonning ikki karra "eng yaxshi darvozaboni Pavel Bugaloning fikrlari bilan qiziqdik. 

- Pavel Viktorovich Qatarda bo'lib o'tadigan Osiyo Kubogida O'zbekistonning imkoniyatlari qanday?

- Umid qilamanki, O'zbekiston guruhdan chiqadi va musobaqada oldinga intilishda davom etadi. Menimcha terma jamoamiz yarim finalga qadar etib bora oladi. Agarda barcha futbolchilar etiborni g'alabaga qaratib, yuqori natija yo'lida birlashishsa, hamma narsa bo'lishi mumkin. O'zbekiston terma jamoasiga Qatardagi Osiyo Kubogida omad tilayman.

- O'zbekiston terma jamoasining ayni paytdagi darvoza chizig'iga fikringiz qanday? Murabbiy barcha o'yinlarda O'tkir Yusupovga ishonch bildirdi. Bu raqobat muhitiga qanchalik tasir qiladi?

- O'zbekiston terma jamoasida kuchli darvozabonlar bor. Albatta, O'tkir Yusupov birinchi raqamli posbon ekanligi shubhasiz. Lekin nazorat uchrashuvlarida barcha darvozabonlarga imkoniyat berish kerak. Abduvohid Nematov, Botirali Ergashev va hokazo. Murabbiylar mashg'ulot vaqtida kim yaxshiroq ekanligini yaxshiroq bilishadi.  

- Osiyo Kubogida qaysi terma jamoani favorit sifatida ko'ryapsiz?

- Musobaqaga hech qachon kuchsiz jamoa bormaydi. Barcha jamoalar favorit hisoblanadi. Bu - futbol. Unda istalgan jamoadan kutilmagan "sovg'alar" kutish mumkin.  Bunday holatga esa tayyor turish kerak. Futbol o'zgaryapti. Har bir terma jamoa kuchaygan. Ochig'ini aytganda turnirda aniq bir jamoani yutishini taxmin qilmayman. 

- Faoliyatingizda 3ta Osiyo Kubogida ishtirok etish nasib qilgan...

- Barcha musobaqalarda qatnashgan tarkibimiz saralangan edi. Oradan ancha vaqt o'tib ketdi. SHu bois tarix haqida nimadir deyishim qiyin. 

- Murabbiy sifatida jamoangizni almashtirdingiz. Endilikda "Paxtakor" murabbiylar shtabida faoliyat olib borasiz. Qadrdon klubga qaytish qanday bo'ldi?

- Xa, "Paxtakor"ga ko'chib o'tdim. "Paxtakor" rahbariyatiga taklif va etibor uchun rahmat. Men buyuk jamoada ishlashimdan xursandman. Bu klubda uzoq vaqt o'ynaganman. Men uchun "Paxtakor" oilamdek gap. G'alabalarga hissamni qo'shish uchun bor kuchim bilan ishlashga tayyorman.