Malumot uchun, Hindiston terma jamoasi Avstraliya, O'zbekiston va Suriya terma jamoalari bilan bir guruhdan o'rin olgan. Igor SHtimac Hindistonning tayyorgarligi va raqiblar haqida fikr bildirdi.
"Biz Dohaga vaqtliroq kelishni istadik. Bu erga moslashishga vaqt kerak edi. Mashg'ulotlarni boshlab oldik. Bizga bo'yi baland va kuchli o'yinchilar kerak. Hozir yangi futbolchilarni sinab ko'radigan payt emas. Bu musobaqada avvaldan biz bilan bo'lgan o'yinchilarga tayanamiz. 26 futbolchidan 17 nafari uchun Osiyo kubogi birinchi katta musobaqa bo'ladi.
Biz guruhda autsayder sifatida ko'rilmoqdamiz. Avstraliya musobaqa favoritlaridan biri. O'zbekiston - musobaqadagi "sirli tulpor", ularning so'nggi natijalari juda yaxshi. To'pga ko'p ham egalik qilmasligimizni va gol urish uchun imkoniyatlarimiz kam bo'lishini bilamiz. Biroq, biz aniq maqsadni o'z oldimizga qo'ya olishimiz kerak. Asosiy vazifamiz gol o'tkazmaslik bo'ladi, undan so'ng esa gol urishga harakat qilamiz.
O'yinchilarim musobaqadan zavq olishlarini istayman. Natija haqida o'ylamasdan, tajriba yig'ishga harakat qilishimiz lozim. Men o'yinchilarga hech qanday bosim yuklamayapman. Maydonga tushamiz va jang qilamiz", - deydi Hindiston termasi ustozi Igor SHtimac.
Eslatib o'tamiz, Hindiston terma jamoasi Osiyo kubogi guruh bosqichidagi ilk uchrashuvini 13 yanvar kuni Avstraliya termasiga qarshi o'tkazadi. Ikkinchi turda esa Hindiston termasiga O'zbekiston milliy jamoasi raqiblik qiladi. Ushbu uchrashuv 18 yanvar kuni bo'lib o'tadi.
Bosh sahifaga
94