Yil davomida yig'ilib kelgan muammolar suv yuzasiga qalqib chiqmoqda. Bir qarasangiz "Neftchi"da, bir qarasangiz "Navbahor"da. PFL 10 yanvarga qadar klublarga qarzdorlikni bartaraf etish bo'yicha muhlat bergan, aks holda jiddiy choralar ko'rilishini malum qilgandi. Mazkur masala yuzasidan O'zbekiston futbolchilar uyushmasi rahbari Kamoliddin Murzoevning fikrlari bilan qiziqdik.
- Hozirgacha nechta va qaysi klublar qarzlarni to'liq yopgan? Klublarimizda harakat qanday ketyapti?
- O'zbekiston futbol associaciyasi va O'zbekiston professional futbol ligasi bilan birga klublardan futbolchi, murabbiy, ishchi xodimlar o'rtasidagi qarzdorliklarni bartaraf etish yuzasidan hisobot berishini so'ragan edik. Bugungi kunda faqat 3-4 jamoa bu ishni amalga oshirdi. O'FA, PFL va O'FU bilan birga qilinayotgan ishlar bois so'nggi yillarda qarzdorlik masalalari tartibga solingan. SHunga qaramasdan, bazi bir jamoalarimizda futbolchilar, murabbiylar oldida qarzdorliklar mavjud. Eng muammoli jamoalarni aytadigan bo'lsak, "Yangier", "Paxtakor-79", yana kelib tushgan murojaatlar bo'yicha "So'g'diyona", "Buxoro", "Neftchi", "Navbahor", bundan tashqari uzoq yildan buyon davom etib kelayotgan "Surxon" jamoasi futbolchilar oldida qarzdorlikni to'liq bartaraf etgani yo'q. Ayollar jamoalarimizdan ham mukofot pullari bo'yicha murojaatlar kelib tushyapti.
- Nima uchun aynan yil oxirida, qishda bu masalalar ko'tariladi?
- Har yil yakunida shunday muammolarning kelib chiqishi nimadan iboratligini aytsam. Futbolchilar klub bilan bir yillik mehnat shartnomasini tuzishadi. Qarzdorlik bo'yicha ko'p marotaba klubga yuzlanishadi. SHartnomasi tugagunga qadar pul ololmagach, jamoani tark etganda, qarzdorlik yuz foiz hal bo'lmaganda yuzaga chiqib keladi.
- Klublarga qanday chora ko'riladi? Ularga qanday sankciyalar qo'llanilishi mumkin?
- O'FAda 16 yanvar kuni klub rahbarlari bilan katta yig'ilish kutmoqda. SHundan so'ng qanday sankciyalar qo'llanilishi, choralar aniq bo'lishi mumkin.
- Osiyo Kubogida O'zbekiston terma jamoasining ustun taraflari nimada? Yaxshi natija qayd etish qaysi omillarga bog'liq?
- Legionerlarimiz, mahalliy futbolchilar murabbiyning ko'rsatmalari asosiyda bir oila bo'lib harakat qilishsa, maqsadga muvofiq bo'ladi. Asosiysi ishonch. Barchamiz terma jamoamizga ishonishimiz kerak. Avvalgi natijalarni yangilash, katta maqsadlarni qo'yish vaqti keldi. Buni futbolchilar ham o'zi his qilib turibdi.
- Osiyo Kubogida jamoaviy o'yinmi yoki individual harakatlar muhim rol o'ynaydi?
-Menimcha, jamoaviy o'yinimiz asosiy planga chiqishini kutyapman. Yuqorida aytganimdek, ayrim pallalarda indivuidual mahorat ham kerak bo'ladi. Lekin yuqori maqsadni ko'zlagan jamoalar o'yinni jamoaviy uslubda quradi.
Bosh sahifaga
246