Ushbu o'yinda qatnashish uchun Doha shahriga juda ko'p suriyalik jurnalistlar ham tashrif buyurishgan. Biz ularning O'zbekiston bilan o'yin haqidagi fikrlari bilan qiziqdik. Xususan, PSYRIANP nashri jurnalisti, suriyalik Layes Bayroqdor o'z terma jamoasi imkoniyatlarini yuqori baholadi va bu fikrlarini asoslashga harakat qildi. Suhbatdoshimizdan familiyasi haqida so'raganimizda unda turk qoni borligini aytdi, ammo u o'zini Suriya farzandi deb hisoblashini alohida takidladi.
- Ertangi o'yindan qanday natija kutyapsiz?
- Bu o'yin juda qiyin uchrashuv bo'lishi aniq. Ikkala jamoa uchun ham bu katta sinov. Bosh murabbiyimiz Ektor Kuperda o'zbek futboli haqida katta bilim bor. Bu Suriya terma jamoasi uchun katta ustunlik beradi. Ertangi o'yin natijasi haqida mendan deylik bir oy oldin so'raganingizda men O'zbekiston terma jamoasini favorit sifatida ko'rsatgan bo'lardim. Lekin hozir Suriya termasi men uchun favoritga aylandi. Biz yaqinda suriyalik bo'lmagan kuchli futbolchilarni mahalliylashtirdik. Argentina, Evropa va Peruda o'ynagan bu futbolchilar jamoamizni yanada kuchaytirdi. Fikrimcha, bu o'zgarishlar bizning jamoaga katta ustunlik beradi.
- Suriya va O'zbekiston o'rtasidagi o'yinning hisobini taxmin qila olasizmi?
- Suriya terma jamoasi 1:0 yoki 2:1 hisobida g'alaba qozonadi.
- Guruh bosqichi o'yinlaridan keyin sizningcha jadval qaysi ko'rinishda bo'ladi?
- Qiyin savol. Fikrimcha, Avstraliya, Suriya, O'zbekiston va Hindiston - shunday tartibda.
- Keskin fikrlar, O'zbekiston uchinchi o'rin bilan keyingi bosqichga chiqadimi?
- Bu omadga bog'liq, albatta. Men shu o'rinda bir narsani takidlab o'tishim kerak. Hindiston terma jamoasi ham oxirgi paytlar katta o'sishga erishdi. Ular bizning guruhdagi jamoalarga yaxshigina qarshilik ko'rsatishadi. Raqiblar ulardan ehtiyot bo'lishlari kerak.
- Taxminlar uchun rahmat. Ertaga bu fikrlaringizdan hafa bo'lib qolmasangiz bo'lgani (hazil manosida)
- Ikkala jamoaga ham omad tilayman. Agar ertaga O'zbekiston g'alaba qozonsa, chin qalbimdan sizlarni tabriklayman.
Bosh sahifaga
115