SHomurodov muhim figura, terma jamoani o'yini bevosita uning atrofida qurilgan. U nafaqat sof hujumchi bo'lish bilan birga o'yin davomida funkciyasini o'zgartirishi, qanotlarda, hujumchi ortida, erkin futbolchi sifatida o'zi bilan bir nechta futbolchini olib yuradi. Tabiiyki, Eldordagi bu hislat muhim faktor hisoblanadi. Xo'sh, uning o'rniga asosiy tarkibda kim maydonga tushadi?
Asosiy nomzod Oston O'runov - Ostonning individual sifatlari, borgan sari Katanecning muhim figurasiga aylanib borayotgani bunga sabab, deb o'ylayman. Jismonan baquvvat, yaxshi texnikaga ega va hujumni yakunlash xususiyatiga ega. Oston hujumchi bo'lmasada bu yil barcha musobaqalarda aksariyat hujumchilardan ko'p to'p kiritdi, 10dan oshiq gol urdi. Yuqorida aytganimdek, O'mon bilan o'yinda Oston chizig'iga joylashdi. Osiyo kubogining ilk o'yinida ham O'mon bilan uchrashuvdagi taktik-uslubni ko'rsak ajablanmayman. Oston milliy terma jamoada birinchi, asosiy plan futbolchisi. Deylik uni zaxirada olib qo'yib, o'yinni o'zgartirish, "B" plan olib qo'yishdan foyda yo'q. Sloveniyalik mutaxassis raqibdan kelib chiqib yana boshqa variantlarni ham qo'llash ehtimoli yo'q emas. Qirg'iz Respublikasiga qarshi kechadigan nazorat uchrashuvi ko'p narsalarga aniqlik kiritib beradi.
Oston O'runovning asosiy tarkibda SHomurodovning o'rnida maydonga tushish ehtimoli: 70/30
Igor Sergeev - O'zbekiston terma jamoasi istalgan raqib bilan 3ta markaziy himoyachi taktikasidan voz kechmasligini bilaman. Sergeev va Abdixoliqov ikkinchi bo'limda bitta himoyachining o'rniga maydonga tushib, o'yinni kuchaytiradigan vosita sifatida xizmat qilishi mumkin. Igor sof to'qqizlik hujumchisi va u faqat jarima maydonchasi ichidagina foyda keltira oladi. Kuchli tomoni ham shunda. Qanotlarda, yarim himoyada katta samara bermaydi. Ikkinchi bo'limda yarim himoyachilar, vingerlarning faolligi hisobiga bizda vaziyatlar ko'payadi va bunda gol uradigan yaqqol hujumchiga ehtiyoj seziladi. Igor esa "sehrli tayoqcha" rolida paydo bo'lishini kutmoqdaman. Igor 2015 yil Avstraliyadagi Osiyo kubogida qatnashgan va ilk o'yinda KXDR darvozasiga g'alaba golini urgandi. Unda yana bir bor shunday imkoniyat bor.
Asosiy tarkibda tushish ehtimoli: 40/60
Bobir Abdixoliqov - Katanec Bobir Abdixoliqovga faqat Meksikaga qarshi o'yindagina asosiy tarkibda imkoniyat berdi va u gol urdi. Abdixoliqovda tezlik, texnika, to'p bilan harakat qilish, ochiq zonalarda ochilish sifatlari bor. Aynan shuning evaziga Katanec 3ta uchrashuvning birida Bobirni asosiy tarkibda maydonga tushirishi mumkin. Katanecning uslubida individual tomondan kuchli ijrochilar muhim rol o'ynaydi. Agarda Oston hujumchi vazifasini zimmasiga olsa, Bobir va Igor "B" plan qurollari bo'lishadi. Bobirda kichik imkoniyatdan ham foydalanib ketish sifatlari bor.
Asosiy tarkibda tushish ehtimoli: 40/60
Aziz Amonov - Futbolchi o'tgan mavsum "Nasaf" tarkibida yorqin o'yinlar o'tkazdi. 26ta o'yinda 4ta gol, 3ta assist qayd etdi. OCHLda ham o'zini ko'rsatdi. Klub fonida ko'rsatkichlari ajoyib. Lekin mavsum davomida terma jamoa miqyosida Katanecning rejalariga kiritilgani yo'q. Katanec so'nggi variant sifatida Amonovdan foydalanishi mumkin. Amonovda jarima maydonchasi ichida tezkor qaror qabul qilish, to'p bilan yaxshi muomala qilish sifatlari yaxshi shakllangan.
Asosiy tarkibda tushish ehtimoli: 40/60
Maydonga kim tushgan taqdirda ham terma jamoamizga omad tilab qolamiz.
Bosh sahifaga
319