Osiyo Kubogida muhim voqea ro'y berdi — turnirda ilk marotaba ayol hakam ishladi! 37 yoshli Yosimi Yamasita Avstraliya va Hindiston (O'zbekiston terma jamoasi bilan bir guruhdan joy olgan jamoalar) uchrashuvini boshqardi.
Yamasita yaponiyalik dastlabki professional ayol hakam hisoblanadi. U 2015 yil FIFA referisiga aylandi. O'shandan beri uzoq yo'lni bosib o'tdi.
2022 yilning sentyabrida Yosimi arbitr sifatida J1 ligasidagi ilk o'yinini o'tkazdi. Bundan tashqari, u JCH-2022'da hakamlik qilgan olti nafar ayoldan biri edi — Yamasita turnirdagi to'rtta o'yinda zaxira hakami etib tayinlandi.
Transfermarkt malumotlariga ko'ra, Yamasita erkaklar futbolida jami 61 ta bellashuvda faoliyat olib borgan. Jumladan, u Gana va Indoneziya, shuningdek, Franciya va Meksika yoshlar terma jamoalari o'rtasidagi xalqaro o'rtoqlik uchrashuvlarida hakamlik qilgan. Yosimi J1 ligasida 12 ta, Yaponiya kubogida esa yana ikkita o'yinga tayinlangan rasmiylar qatoridan o'rin olgan. Bundan tashqari, Yamasita Osiyo chempionlar ligasining ikkita uchrashuvida hamda OFK kubogi doirasidagi bitta o'yinda hakamlik qilgan.
Yaponiyalik hakamga tegishli noodatiy bahs ham mavjud — u 2023 yilning mart oyida Premer-liga yoshlar birinchiligi doirasidagi "Blekbern" va "Liverpul" o'rtasidagi o'yinni boshqargan.
Albatta, Yamasita ayollar futbolidagi o'yinlarda ham hakamlik qilgan. U ayollar o'rtasidagi ikkita jahon chempionati va ikkita Osiyo kubogida ishlagan hamda 2020 yilgi Olimpiya o'yinlarining ayollar futboli turniridagi bellashuvlarda ishlagan.
SHuningdek, Avstraliya va Hindiston terma jamoalari o'rtasidagi to'qnashuvda Yosimiga ikki nafar qiz hakam — Makoto Bozono va Naomi Tesirogi yordam berganini ham takidlash lozim.
SHubhasiz, Yosimi Yamasita va uning yordamchilari Osiyo Kubogining yana bir nechta o'yinlarida ishtirok etishadi.
Nikolay Egorichev tayyorladi.
Bosh sahifaga
87