Biroz avval "E" guruhi vakillari guruh bosqichini yakunlashdi. Yakunlaganda ham har ikkala uchrashuvda siz-u biz "teatr" guvohiga aylandik.
Osiyo Kubogi. Janubiy Koreya Yaponiya bilan tushishni istamadi, Bahrayn peshqadam sifatida pley-offga chiqdi
Son Xyon Min sardorligidagi Koreya Respublikasi o'z guruhida birinchi o'rinni olib nimchorak finalda Yaponiyaga tushib qolmaslik uchun Malayziya bilan bahsda yutmaslik uchun o'ynadi, ochiqchasiga. Narigi bellashuvda esa peshqadam bo'lib turgan Iordaniya Bahraynga uyatsizlarcha yutqazib berdi. 2-bo'limda har ikkala jamoa muxlislari futbolchilar hujum qilmayotganidan norozi bo'lib xushtakbozlik qilishayotgani videosini kanalimizga joyladik.
Xullas, Iordaniya ham, koreyslar ham ochiqchasiga yaponlardan qochdi. Yaponlarga "dux"ni berishning eng ochiqcha ko'rinishi bu. Bu guruh g'olibi 1/8 finalda Yaponiyaga qarshi o'ynashi kerak edi va o'sha jamoa kutilmaganda Bahrayn bo'lib ketdi. Narigi ikkita uyatsizlar esa ikkinchi va uchinchi o'rin bo'lib olishdi. Yaponiya Iroqqa yutqazib qo'ymaganida shuncha tomoshani ko'rmasmidik, quyonlar bo'yini ko'rsatmasmidi)
2009-2013 yillarda O'zMU Jurnalistika fakultetida o'qiganman. Har yili mini futbol bo'yicha dekan kubogi musobaqasi o'tkazardik. Bizning kurs 4 yil ichida 3 bor dekan kubogida g'alaba qozongan. Faqat bir yil g'oliblikni berib qo'yganmiz.
Har yili dekan kubogida kursimizdan 2ta jamoa tuzib qatnashardik. O'sha g'olib bo'lolmagan yilimiz ikkala jamoamiz qurada bitta guruhga tushib qolgan. Oxirgi turda o'zaro o'ynashimiz kerak bo'lgan va ikkinchi jamoamizni ham yarim finalga olib chiqish uchun ikkinchi jamoamizga yutqazib berganmiz. Yakunda o'sha yili har ikkala jamoamiz chempion bo'la olmagan. Bitta katta kurslar g'olib bo'lgan.
Ha, o'shanda turnir tugagach ayyorlik (g'irrom desa ham bo'ladi) qilganimizga afsuslanganmiz. Normal holatda shunday bo'lishi ham kerak: G'irrom qilganlar qaerdadir qoqilishi zarur.
Eng qizig'i, bu hali hammasi bo'lmasligi mumkin. Birozdan keyin start oladigan uchrashuvda Saudiya Arabistoni va Tailand o'zaro bahs olib boradi. Ayni paytda guruhda saudiyaliklar peshqadam bo'lib turishibdi, tailandliklar esa ikkinchi o'rinda. Bugun katta ehtimol bilan S.Arabistoni yutqazish uchun, Tailand esa yutmaslik uchun o'ynaydi. Ana sizga tomosha-yu, mana sizga tomosha. Umid qilaman, saudiyaliklar bunaqangi "teatr"ga yo'l qo'yishmaydi va normal futbol o'ynashadi. Bu umidlarim shunchaki umidligicha qolib ketmasligiga umid qilaman.
Bugunga belgilangan 4ta uchrashuv ichida yagona erkakchasiga jang bo'ladigan o'yin Qirg'iz Respublikasi - O'mon bahsi bo'lib ko'rinmoqda. SHu to'qnashuvda rosmana futbol bo'ladi. Darvoqe, shaxsan o'zim "Education City stadium"daman va Saudiya Arabistoni - Tailand uchrashuvidan o'quvchilarimiz uchun rasmlarni taqdim etaman. Qachondir teatr spektaklida rasmga olaman deb o'ylamagandim. Xullas, oxiri nima bo'lishini kuzatamiz.
Koreya Respublikasi va Iordaniya o'rtasidagi uchrashuvni bevosita stadiondan kuzatgan edim. Ular juda kuchli edi. SHunga qaramay, bugun ular qo'rqoqlarga xos harakat qilishdi. Ular futbolning ustidan kulishdi, endi futbol ularning ustidan kulishi kerak. Bu chempionlar mentalitetiga mos emas. Jimgina o'z o'yinini o'ynab kelayotgan Eron, Yaponiya, Iroq, Qatar, Avstraliya va O'zbekiston chempionlik yo'lida yuqoridagi favorit deb hisoblangan "autsayderlar"ni yanchib o'tib ketishi kerak. SHunda adolat qaror topgan bo'ladi.
Osiyo Kubogi-2023 guruhlardagi holat >>>>> OK-2023
Bosh sahifaga
609