Keltirilayotgan malumotlar ko'lami va o'zaro uyg'unligini tahlil qiladi, o'qib borgani sayin uning uchun davomi yanada qiziqarli bo'lib boraveradi. Yana boshqa kim esa qisqa va lo'nda yozilgan maqolalarga qiziqadi, uzundan-uzun maqolalarni yoqtirmaydi.
Yuqoridagi aytilgan ikkinchi toifaga mos keluvchi kishilarni ham tushungan xolda maqola sarlavhasida qo'yilgan savolga boshidanoq javob berib ketamiz, "Hokim kubogi-2024" o'tkazilmaydigan bo'ldi. Bir necha yillik tarixiga ega va vodiyda yaxshi ananaga ega bo'lgan turnir ayrim sabablarga ko'ra to'xtatildi. Bu jarayon balki vaqtinchadir, kelasi yildan yana davom etishi ham mumkin, bunisini vaqt ko'rsatadi.
Agar hozir sizda nega degan savol tug'ilayotgan bo'lsa, albatta bunga haqlisiz. Bugungi kun davomida mening manzilim tomon eng ko'p yo'llagan savol ham aynan shu bo'ldi. CHunki "Hokim kubogi-2024" o'tkazilmasligi haqidagi malumot ijtimoiy tarmoqlarga allaqachon sizib chiqdi. Masalan, ayni mavzuda saytimiz bosh muharriri Narzulla Saydullaev ham kecha o'zining telegramdagi sahifasida birinchilardan yozib o'tgandi.
Vaziyatdan kelib chiqib kichkinagina surishtiruv o'tkazdim, ushbu musobaqaning o'tkazilmasligiga sabab ishtirok etish uchun murojaat qilgan jamoalarning soni kamligida bo'lgan. Vodiyning aksariyat klublari qishki o'quv-yig'in mashg'ulotlarini Turkiyada o'tkazayapti, real yondashadigan bo'lsak, ular "Hokim kubogi-2024"da qatnasha olishmaydi. Farg'ona futbol associaciyasi ananaga aylanib qolgan ushbu musobaqani o'tkazishga tayyor edi, bu haqida ijtimoiy tarmoqlardagi sahifalarida ham malum qilgandi. Biroq, kelib tushgan murojaatlar soni bitta turnir tashkillash uchun etarli bo'lmagan.
"Hokim kubogi" biz yanvar-fevral oylarida qiziqib tomosha qiladigan eng yaxshi saviyadagi futbol musobaqasi edi. Ushbu turnirga har yili qo'shni davlatlardan ham futbol klublari kelib, bir necha bor ishtirok etishganini yaxshi bilasiz albatta. Eshitishimizga qaraganda, Qirg'iz Respublikasining "Alay" klubi shu yili ham qatnashish istagida bo'lgan.
Farg'onada tashkil etiladigan "Hokim kubogi" musobaqasining nufuzi va jozibasi boshqacha edi. Masalan, "Neftchi" va "Qizilqum" to'qnash kelgan finalni eslaysizmi? Yana "Neftchi" - "Qo'qon-1912" yoki "Qo'qon-1912" - "Andijon" finallari ham o'ta yuqori darajada o'tgandi. 2021 yilgi mavsumda Toshkentning "Bunyodkor" klubi ushbu musobaqaning bosh sovriniga ega chiqqan. SHuningdek, O'zbekiston futbol associaciyasi hakamlar uchun tashkil etiladigan qishki o'quv-yig'in mashg'ulotlarining amaliy qismini Farg'onaga, "Hokim kubogi" musobaqasiga ko'chirgan yillar ham bo'lgandi.
"Hokim kubogi" musobaqasining bu yilda o'tkazilmayotgani uchun kimnidir aybdor sifatida ko'rsatmadik, bunday qarashda ham emasmiz. Maqola ushbu musobaqa qachon boshlanarkan deb kutib yurgan muxlislar uchun malumot o'rnida yozildi.
P.S. Maqolada "Hokim kubogi" musobaqasi iqtidorli yosh futbolchilar uchun katta tajriba bo'lardi" qabilidagi balandparvoz jumlalarni ishlatishni lozim topmadik.
Bekzod Tolibov
Bosh sahifaga
300