Namangan shahridagi “Markaziy” stadionda o'tkazilgan “Navbahor” jamoasining taqdimot marosimida viloyat hokimi so'zga chiqar ekan, jumladan shunday dedi: - Barcha namanganlik futbol ishqibozlarini yaqinlashib kelayotgan yangi futbol mavsumi bilan chin dildan tabriklayman. Bu yilgi Superliga bahslariga jamoamiz har qachongidan ko'ra, puxta tayyorgarlik ko'rdi deb bemalol ayta olamiz. Jamoani ko'ngildagidek mashg'ulot o'tkazishi uchun Turkiyada o'quv-yig'inini tashkil etdik. Tarkibni murabbiylarimiz istaganidek kuchaytirishga urindik. Selekciya jarayonida etiborga molik o'tishlarga qo'l urildi. Xususan Azizbek Turg'unboev “Paxtakor”ga transfer qilindi. Bu menimcha klub tarixida eng yaxshi transferlardan biri bo'ldi desam mubolag'a bo'lmasa kerak. Nasib qilsa kelgusi yillarda ham xuddi shunday transferlarni bir emas ko'proq amalga oshirsak, bundan jamoamiz yutadi. Bu yil klubda katta islohatlarga qo'l urdik. Xususan bungacha jamoa prezidenti sifatida Namangan shahar hokimi qayd etilib kelingan bo'lsa, endilikda ushbu lavozimga futbolning ichida yurgan inson Otabek Samatovni tayinladik. Jamoa ichida qandaydir muammo yuzaga kelsa shahar hokimi yoki boshqa mutasaddi bosh qotirmaydida, klubga biriktirilgan prezident ushbu muammoni bartaraf etish yo'lida ishlaydi. Menimcha bu eng to'g'ri qaror bo'ldi. Qachongacha futbolchi o'z muammosini hokimga sms yozish orqali hal qiladi?!
- SHuningdek bu yildan etiboran “Navbahor” mahalliy yoshlarga ham katta etibor qaratadi. O'tgan yili bir qator yoshlar jamoamiz yomon natija qayd etggani yo'q. Bu yil endi ularga bo'lgan talabni kuchaytiramiz. SHaroitlarini yaxshilaymiz. Bir vaqtlar jamoa istiqomat qilgan mehmonxonani o'rniga futbol maktabi qurishni dasturga kiritganmiz. O'rinbosarlar va farm-klub jamoalarini o'sha futbol maktabida ushlaymiz. SHundagina mahalliy iqtidorlar ko'zga ko'rina boshlaydi. Albatta buning uchun biroz vaqt kerak bo'ladi.
- “Navbahor” klubiga bo'lgan etiborni oshirish maqsadida turistik firmasini joriy etib, unga 51 o'rindiqli avtobus xarid qilindi.
- Har yili mavsum avvalida stadion fayesiga “Navbahor” uchun o'ziga xos shior tanlab olinib, katta xarflar bilan yozib qo'yilardi. Bu yilgi chempionat oldidan endi mening taklifim – “Navbahor” chempion! Stadion ichiga kirishingiz bilanoq endi shunaqa yozuvga ko'zingiz tushadi.