2005-2006 yil tug'ilgan futbolchilardan iborat bu jamoaning asosiy maqsadi 2028 yil Los Anjeles olimpiyadasiga tayyorgarlik ko'rish hisoblanadi. Joriy yil ilk bor Pro ligada qatnashadigan jamoaga Farhod Nishonov ustozlik qilmoqda. Bir necha kun oldin jamoa “Aral”ga qarshi nazorat uchrashuvida qatnashdi. Murabbiy Farhod Nishonov saytimiz muxbiri bilan bo'lgan suhbatda yangi mavsumga tayyorgarlik jarayonlari bilan o'rtoqlashdi.
"Olimpik Mobiuz" nomi bilan Pro ligada qatnashadigan bo'ldik. Tayyorgarlik reja asosida ketmoqda. Tarkibimiz faqat yosh futbolchilardan iborat. Ular 18-19 yoshdagi o'yinchilar hisoblanishadi. U-20 terma jamoasiga nomzod futbolchilarni jamoaga taklif qilganmiz. Eng yoshi kattalarimiz 2005 yil, eng kichigi 2007 yil. Superligada, o'z jamoasi asosiy tarkibida o'ynayotgan va nomzod futbolchilarni bezovta qilmaganmiz. O'yin amaliyotisiz qolganlarni jalb qilganmiz. Maqsadimiz Superligaga yo'llanma olish.
Hozirgi tarkibimizdan kelib chiqib aytganda biroz qiyin bo'lishi mumkin. Sababi futbolchilar hali yosh. Lekin bizning maqsadimiz bor. SHu bois yaxshi tayyorgarlik olib bormoqdamiz. Pro liga jamoalariga qarshi nazorat uchrashuvlarida o'ynamoqdamiz. Aytish mumkinki, daraja borasida Superliganikidan qolishmaydi",- deydi Farhod Nishonov.
Malumot uchun, 2021 yil Pro ligada debyut qilgan "Olimpik" Timur Kapadze qo'l ostida ilk mavsumdayoq Superligaga yo'llanma olgan edi.
Bosh sahifaga
183