Tarkib va transferlar
O'tgan mavsum yakunlanganidan so'ng "Olimpik"ning ko'plab futbolchilari boshqa jamoalar bilan muzokaralar olib borishga kirishib ketishdi. Bu orada Jasur Jaloliddinov "Neftchi" bilan shartnoma imzoladi. Abdurauf Bo'riev "Paxtakor", Alisher Odilov hamda Saidazamat Mirsaidov "Navbahor" bilan kelishuvga erishdi. Ibrohim Ibragimov, Otabek Jo'raqo'ziev, Temur Mamasiddiqovlar ham boshqa jamoalar bilan deyarli kelishib olgan edi. Lekin, yakunda rahbariyat va murabbiylar Olimpiadaga yo'llanma beradigan U-23 Osiyo kubogi yaqin bo'lgani sabab futbolchilarni bir joy ("Olimpik")da ushlab turishga qaror qilishdi. SHu sababdan yuqoridagi o'yinchilar "Olimpik"ka qaytdi. Odilov va Mirsaidov "Navbahor" bilan Turkiya yig'iniga ketgan joydan qaytib keldi. Bulardan tashqari, transfer huquqi "Metallurg"ga tegishli markaziy himoyachi Odil Abdumajidov "Dinamo"ga o'tdi. 2023 yilning ikkinchi davrasini "Olimpik"da o'tkazgan SHerzod Esanov yana "Andijon"ga qaytib ketdi.
Temur Kapadze jamoasiga bu yil "Navbahor", "Neftchi", "Metallurg" o'rinbosarlar jamoasidan o'yinchilar jalb etildi. O'tgan mavsumning 2-davrasini "Metallurg"da o'tkazgan Muhammadaziz Ibrohimov va "Surxon"da o'ynagan SHahzod Toirov jamoaga qaytdi.
Bu mavsum "Olimpik"ning U-21 jamoasini Timur Kapadze boshqarmaydi. Balki, Odil Ahmedov FA tarbiyalanuvchilari "Olimpik" o'rinbosarlari sifatida o'ynaydi. SHu sabab aynan terma jamoamiz sobiq sardori akademiyasi tarbiyalanuvchilari mavsum davomida bemalol asosiy jamoada ham o'ynay olishlari mumkin. Masalan, U-17 Osiyo va Jahon chempionatlari ishtirokchisi Behruz Jumatov (markaziy himoyachi) "Olimpik"ning asosiy jamoasi bilan mashg'ulotlarda ishtirok etmoqda va jamoa bilan Qarshiga ham kelgan.
"Olimpik"ning Superliga-2024 uchun qaydnomasi:
1.SHukron Yo'ldoshev, darvozabon
2.Saidazamat Mirsaidov, himoyachi
5.Davronbek Olimjonov, himoyachi
7.Ibrohim Ibragimov, yarim himoyachi
8.Nodirbek Abdixoliqov, yarim himoyachi
9.Asadbek Jo'raboev, hujumchi
10.Farruxbek Muxtorov, yarim himoyachi
11.Otabek Jo'raqo'ziev, hujumchi
13.Hamidullo Abdunabiev, darvozabon
15.Muhsin Bozorov, yarim himoyachi
16.Rian Islamov, yarim himoyachi
17.Jaloliddin Sodiqov, himoyachi
18.Akbar Abdirasulov, himoyachi
19.Ahmadullo Muqumjonov, himoyachi
21.Muhammadaziz Ibrohimov, yarim himoyachi
22.SHahzod Toirov, himoyachi
23.Abdurauf Bo'riev, yarim himoyachi
28.Rustam Jahonov, himoyachi
29.Aleksandr Zevadinov, himoyachi
37.Alisher Odilov, hujumchi
44.Asadbek Rahimjonov, himoyachi
77.Temur Mamasidiqov, hujumchi
99.Edem Nemanov, darvozabon.
Qishki yig'indagi natijalar
"Olimpik" jamoasi qishga mo'ljallangan dastlabki yig'inni 17-28 dekabr kunlari Turkiyaning Antaliya shahrida olib bordi. Yig'in doirasida Qozog'istonning "Kaysar" klubiga qarshi ikkita nazorat uchrashuvi o'tkazildi.
Nazorat uchrashuvi
23.12.2023
"Olimpik" - "Kaysar" (Qozog'iston) 2:0
Gollar: O.Jo'raqo'ziev, F.Sohibjonov
26.12.2023
"Olimpik" - "Kaysar" (Qozog'iston) 2:0
Gollar: A.Odilov, R.Jiyanov
SHundan so'ng jamoaga kichik dam berildi. 2024 yilning 6 yanvar sanasidan esa Toshkentda navbatdagi yig'inga kirishildi. Poytaxtimizdagi 10 kunlik yig'inda Samarqandning "Dinamo" jamoasi bilan bellashildi.
Nazorat o'yini
10.01.2024
"Odil Ahmedov akademiyasi" stadioni
"Dinamo" - "Olimpik" 2:0
Gollar: D.Rahmatullaev, B.Nasimov
"Olimpik" yig'ini 17 yanvardan 7 fevralga qadar Turkiyada davom etdi. Ana davr mobaynida Kapadze jamoasi jami 7ta o'rtoqlik uchrashuvida maydonga tushdi.
Nazorat o'yinlari
20.01.2024
"Olimpik" - "Radnichki" (Serbiya) 2:3
Gollar: J.Jaloliddinov, A.Odilov
23.01.2024
"Olimpik" - "SKA-Xabarovsk" (Rossiya) 0:3
24.01.2024
"Olimpik" - "Jenis" (Qozog'iston) 0:1
27.01.2024
"Olimpik" - "Aktobe" (Qozog'iston) 2:1
Gollar: SH.Toirov, J.Jaloliddinov - M.Samorodov
28.01.2024
"Olimpik" - "Maxachkala" Dinamo (Rossiya) 2:4
Gollar: U.Hoshimov, J.Jaloliddinov
04.02.2024
"Olimpik" - "Ximki" (Rossiya) 2:1
Gollar: A.Odilov (pen.), I.Ibragimov (pen.) - D.Stepanov
05.02.2024
"Olimpik" - "Kolxeti-1913" (Gruziya) 2:1
Gollar: P.Xoldorxonov, M.Abdumannopov.
Turkiyada o'tkazilgan ikkinchi yig'indan keyin "Olimpik" 13 fevraldan boshlab yangi mavsumga Toshkentda tayyorgarlik ko'rib keldi. Orada 16 fevral kuni kuchli qor ostida "Mashal" bilan nazorat uchrashuvi ham o'tkazildi.
Nazorat o'yinlari
16.02.2024
"Olimpik" - "Masha" 0:1
Gol: A.Murodov
Jamoa qaysi brend liboslaridan foydalanadi?
"Olimpik" bu yil ham xuddi o'tgan mavsumdagidek "Nike" brendi ekipirovkalari va liboslaridan foydalanadi. Faqat yangi liboslar Toshkentga to'liq etib kelmagani sabab jamoa "Nasaf"ga qarshi 1-tur o'yinida o'tgan yilgi formada o'ynaydi.
Superliga-2024 startida "Olimpik" kimlar bilan o'ynaydi?
Timur Kapadze shogirdlari Superliga-2024 1-turini Qarshida "Nasaf"ga qarshi o'tkazishadi. 1 mart sanasiga belgilangan bahs 19:15da start oladi va "Sport" telekanalida to'g'ridan-to'g'ri efirga uzatiladi. 2-turda "Olimpik" "Lokomotiv"ni mehmon qiladi. 9 mart sanasiga belgilangan ushbu bellashuv "Bunyodkor" stadionida bo'lib o'tadi. Sababi, o'sha paytda "Jar" stadionida qizlar o'rtasida U-20 Osiyo chempionati o'yinlari o'tkazilayotgan bo'ladi. 15 mart kuni esa jamoa 3-tur doirasida "So'g'diyona" mehmoni bo'ladi.
"Olimpik"ning imkoniyatlari
Bu yil Timur Kapadze va uning shogirdlari uchun Superligadanda muhimroq musobaqa bor. 15 apreldan 3 mayga qadar Qatarda U-23 Osiyo kubogi bahslari bo'lib o'tadi. Ana shu musobaqada Parij olimpiadasi yo'llanmalari ham o'ynaladi. SHunday ekan bosh murabbiy asosiy etiborni Osiyo kubogiga qadar futbolchilarni sinab olish va o'yinni yaxshilashga qaratishi shubhasiz. Lekin, bu jamoa Superligaga etiborsizlik bilan qaraydi degani emas. Albatta, ichki chempionatda ham imkon qadar yuqori o'rinlar uchun kurash olib borishga urinilishi aniq. Jamoa "Nasaf", "Navbahor", "Neftchi" yoki "Paxtakor" kabi chempionlik uchun kurashmasa-da, munosib ishtirok etishga urinadi. Tarkibdagi asosiy futbolchilar yozda boshqa jamoalarga ketib qolishi mumkinligini hisobga olsak, "Olimpik"ka ikkinchi davrada oson bo'lmasligi aniq.
Bosh sahifaga
274