Jamoa uzoq vaqt davomida mag'lubiyatsiz odimladi va hattoki chempionlik uchun ham davogarlik qildi, ammo yakunda faqatgina beshinchi o'rinda qoldi.
Farg'onaliklar 2024 yilgi mavsumga qanday holatda kelishdi? SHu haqda gaplashamiz.
Tarkib va transferlar
"Neftchi" mavsumlar oralig'idagi transfer bozorida jiddiy ishladi. Jamoaga quyidagi o'yinchilar keldi:
Darvozabon Sanjar Quvvatov ("Paxtakor");
Darvozabon Botirali Ergashev (OKMK);
Himoyachi Manuchexr Safarov ("Lokomotiv");
Himoyachi Boyan Ciger ("Kedax", Malayziya);
Himoyachi Xurshid Muxtorov ("Turon");
Yarim himoyachi Jasur Jalodiddinov ("Olimpika"dan);
Yarim himoyachi Javohir Qahramonov ("So'g'diyona");
Yarim himoyachi Ketelin Karp ("UTA Rad", Ruminiya);
Yarim himoyachi Sanjar Qodirqulov ("Lokomotiv");
Yarim himoyachi Bilol Toshmirzaev ("Turon");
Hujumchi Mixay Roman ("Petrolul", Ruminiya);
Hujumchi SHoxruz Norxonov ("Buxoro");
Hujumchi Husayn Norchaev ("Alaniya", ijara);
Hujumchi Behruz Oblaqulov ("Mashal");
Hujumchi Nsungusi Effiong ("Kyoge", Daniya).
Ko'rib turganingizdek, jamoaga ko'plab yangi o'yinchilar keldi. Ammo, ko'p miqdordagi o'yinchilar jamoani tark etishdi ham – ular orasida SHarof Muhitdinov ("Nasaf"), Ulug'bek Hoshimov ("Surxon"), Umar Adhamzoda ("Paxtakor"), Tomislav Mrchela ("Rudes", Xorvatiya), Giorgi Nikabadze ("Navbahor"), Bachana Arabuli ("Kyonnam", Janubiy Koreya), Izzatilla Abdullaev ("Lokomotiv"), Sunnatilla Abdullajonov ("Andijon"), Nodir Nematxonov ("Surxon"), Aleksey Larin, Lutfulla To'raev (faoliyatini yakunladi), Fozil Musaev,, Vladimir Nazarov ("Surxon") bor.
Katta yo'qotish sifatida Vladimir Nazarov va Umar Adhamzodani ko'rsatish mumkin. Ammo, ularning o'rniga darajasi ulardan past bo'lmagan o'yinchilar keldi – Sanjar Quvvatov va Jasur Jaloliddinov.
"Neftchi"ning deyarli har bir yangi o'yinchisi katta qiziqish uyg'otadi. Ketelin Karp uzoq vaqt Rossiyada o'ynagan (RPL va MFL klublari), Husayn Norchaev "Alaniya"dagi muvaffaqiyatsizlikdan so'ng O'zbekistonga qaytdi, Boyan Ciger esa bir necha yil davomida "Navbahor"da o'ynagan. O'zbekistonda o'ynamagan va mahalliy futbol muxlislariga notanish bo'lganlar ham bor – Nsungusi Effiong (u uchun turli manbalarga ko'ra, 25dan 125 ming evrogacha pul to'lashgan) va Mixay Roman.
"Kelish" va "ketish" transferlarini hisobga olsak, "Neftchi" umumiy olganda tarkibni kuchaytirdi.
Yig'inlar va o'rtoqlik o'yinlari
"Neftchi" Turkiyada ikkita yig'in o'tkazdi – 7-27 yanvar va 1-22 yanvar. Jamoa bu vaqt davomida 12ta o'rtoqlik o'yini o'tkazdi:
"Neftchi" - "Xemstede" (Niderlandiya) – 0:0
"Neftchi" - "SKA-Xabarovsk" (Rossiya) – 1:1
Gol: Jaloliddinov.
"Neftchi" - "Leningradec" (Rossiya) - 1:0
Gol: Qodirqulov.
"Neftchi" - "Elimay" (Qozog'iston) - 0:3
"Neftchi" - "Lexiya" (Polsha) - 0:1
"Neftchi" - "Axmat" (Rossiya) - 0:1
"Neftchi" - "Jetisu" (Qozog'iston) - 3:1
Gollar: Norchaev (dubl), avtogol.
"Neftchi" - "Kolxeti-1913" (Gruziya) - 2:0
Gollar: Roman, Toshmirzaev.
"Neftchi" - "Sochi" (Rossiya) – 1:0
Gol: Norchaev.
"Neftchi" - "Sochi" (Rossiya) – 2:2
Gollar: Jaloliddinov, Oblaqulov.
"Neftchi" - "Tyumen" (Rossiya) - 2:1
Gollar: Norxonov, Gulyamov.
"Neftchi" - "Atirau" (Qozog'iston) – 1:1
Gol: Norchaev.
"Neftchi" mavsumoldi o'yinlar doirasida beshta g'alaba, uchta mag'lubiyat va to'rtta durang qayd etdi. Natijalarda ko'rib turganidek, farg'onaliklar yig'in so'nggida formani yig'ib olishgan: oltita o'yinda to'rtta g'alabaga erishilgan, ikki bor durang qayd etilgan.
Murabbiylar shtabi va klub rahbariyatidagi o'zgarish
"Neftchi" tizimidagi yagona o'zgarish Lutfulla To'raevning murabbiylar shtabiga kirishi bo'ldi. 35 yoshli futbolchi o'zining ajoyib faoliyatini yakunladi va endilikda Vitaliy Levchenkoga yordam beradi.
Boshqa malumotlar
Faqatgina fevral oyining oxiriga kelibgina "Neftchi"dan transfer taqiqi olib tashlandi. Farg'onaliklarning sobiq o'yinchilar oldida qarzlari bor edi, shu sabab ularga yangi futbolchilarni ro'yxatdan o'tish taqiqlangandi. Ammo, klub baxtiga bu masala hal etildi.
"Neftchi"ning yangi mavsumdagi texnik homiysi adidas bo'ladi. Farg'onaliklar o'tgan yili Jako firmasi tomonidan tayyorlangan liboslarda harakat qilishgan.
"Neftchi"ning 2024 yilgi mavsumdagi taxminiy tarkibi:
Katta ehtimol bilan Superliganing ilk turlarida "Neftchi"da shunday tarkibni ko'ramiz: Quvvatov, Safarov, Ciger, Jo'raboev, Muxtorov, Karp, Gulyamov, Jaloliddinov, Kaxramonov, Norchaev, Nsungusi (4-2-2-2).
Nikolay Egorichev tayyorladi
Bosh sahifaga
105