"O'zbekiston sport faxriylari kengashi muntazam ravishda sportimiz rivojiga hissa qo'shgan fidoyilarga etibor ko'rsatib keladi. Tashkilot yaqinlashib kelayotgan 8-mart – Xalqaro xotin-qizlar kuni munosabati bilan faxriy ayollarimizga bayram sovg'alarini ulashdi. SHuningdek, tadbirning ikkinchi qismida bu yil o'zining 20-yilligini nishonlayotgan O'zMTRK qoshidagi “Sport” teleradiokanalining faxriy ijodkorlari hamda faoliyatini sog'lom turmush tarzi va sport targ'ibotiga bag'ishlagan bir guruh soha fidoyilariga “O'zbekiston sport faxriysi” ko'krak nishoni topshirildi.
Olimpiya va Paralimpiya shon-shuhrati muzeyida o'tgan tadbirda Sport vazirining o'rinbosari Durdona Rahimova, O'zbekiston Sport faxriylari kengashi raisi Bahodir Maxsitov, ustoz-murabbiylar hamda bir guruh Olimpiya harakati targ'ibotchilari ishtirok etishdi. Durdona SHukrullaevna tadbirni ochib berar ekan, mamlakatimizda xotin-qizlar sportining rivojiga qaratilayotgan etibor, faxriylarimizning ibratli hayot yo'li, ular tomonidan bugungi yutuqlarimiz uchun qo'yilgan poydevor haqida gapirib o'tdi. O'z navbatida, Bahodir Maxsitovich umrini sog'lom turmush tarzi, jismoniy tarbiya va sportni targ'ib qilishga bag'ishlagan ustoz ijodkorlarni etirof etdi. Qolaversa, sport sohasida xizmat qilgan va hozir ham faoliyat olib borayotgan barcha xotin-qizlarni kirib kelayotgan bayram bilan qutladi.
SHundan so'ng, sport sohasining fidoyi onaxonlariga esdalik sovg'alari, ustoz ijodkorlarga esa “O'zbekiston sport faxriysi” ko'krak nishonlari taqdim etildi. Tadbir qatnashchilari davlatimiz tomonidan ko'rsatilayotgan bunday etibor va g'amxo'rlikdan mamnun ekanliklarini bildirishdi. Yakunda faxriylarimiz xalqimiz va yurtimiz farovonligi uchun qo'llarini duoga ochishdi", -deyiladi O'zbekiston Milliy Olimpiya Qo'mitasi bayonotida.
Bosh sahifaga
181