Dastlabki turda «Andijon» o'z maydonida Samarqandning «Dinamo»sini qabul qildi va jangovar tarzda kechgan uchrashuvda 2:2 hisobi qayd etilganini yaxshi bilsangiz kerak.
O'sha bahsda andijonliklar tarkibida iqtidorli o'yinchi SHerzod Esanov boshi bilan raqib darvozasini ishg'ol qilgandi. U bungacha chempionatda ham bitta gol urgani muxlislarining yodida. Esanov «Dinamo»ga qarshi bellashuv, «Navbahor»ga bilan bahsga tayyorgarlik hamda vazifa haqida gapirdi.
-Bu mavsumda «Andijon» safidagi ikkinchi golingizni urdingiz. Sizda hujumkorlik va golli ishtiyoq sezilib turibdi. Bu murabbiyni topshirig'imi yoki shaxsiy vazifangizmi?
-Assalomu alaykum. Ha, albatta, har bir futbolchi o'ziga maqsad qo'yadi. Jamoaga ozgina bo'lsa ham yordam berayotganimdan xursandman va bu murabbiyimizning topshirig'i.
-«Dinamo» bilan o'yin juda shiddatli va tomoshabop o'tdi. O'yin haqida yana nimalarni ayta olasiz?
-O'yin juda ham qiyin bo'lib o'tdi. Maydonda bor kuchimizni berdik. Muxlislarning tinimsiz qo'llab-quvvatlashi va xarakter evaziga o'yinda durang natijaga erishdik, deb o'ylayman.
-Kubokdagi «o'lim guruhi» aynan «Andijon» joy olgan guruh hisoblanadi. O'yinlar shunga monand o'tyapti, deb hisoblaysizmi?
-Ha, albatta. Bizning guruhimizda hamma jamoaga guruhdan chiqish vazifasi qo'yilgan va o'yinlar shunga mos bo'lyapti, deb o'ylayman.
-Oldinda «Andijon»ni vodiy derbisida Namanganda «Navbahor»ga qarshi uchrashuv kutyapti. O'yinga tayyorgarlik qanday va nima kutyapsiz?
-«Navbahor»ga qarshi o'yin uchun har tomonlama tayyorgarlik ko'ryapmiz. Albatta, bu vodiy derbisi. Biz Andijon xalqi, «Andijon» muxlislari uchun bor kuchimizni maydonda beramiz.
-«Andijon» Superligada peshqadam bo'lib turibdi. Bu hol Kubok bahslarida jamoaga motivaciya beryaptimi? Umuman, qanday tasir ko'rsatyapti
-Biz chempionat va Kubok bahslariga birdek tayyorgarlik ko'ryapmiz. Xudo xohlasa, yaxshi natijalar ko'rsatib muxlislarimizni xursand qilishga harakat qilamiz.
-«Andijon»ning Kubokdagi asosiy vazifasi qanday?
-Har bir klub o'ziga oliy maqsad qo'yadi va biz ham bor kuchimiz bilan harakat qilamiz.
«Andijon» matbuot xizmati.
Bosh sahifaga
299