Oston O'runov o'ynayotgan "Persepolis" klubi Eron chempioni bo'lgani haqida xabar berdik. Jaloliddin Masharipov faoliyat olib borayotgan Tehronning "Istiqlol" klubi esa kumush medallarni qo'lga kiritdi.
O'zbekistonlik yana bir futbolchi Dostonbek Tursunov Xuzistonning "Istiqlol" jamoasiga Eron chempionatida jon saqlab qolishiga katta hissa qo'shdi. Tursunov klubga borib qo'shilganida "Istiqlol" 15 ta o'yinda 8 ochko to'plagan va 16 ta jamoa orasida so'nggi o'rinda edi. Himoyachimiz borganidan keyin Xuziston klubi 15 ta o'yinda 20 ochko jamg'ardi va mavsumni 14-o'rinda yakunlashga erishdi. Eron chempionatida 15 va 16-o'rinni band etgan jamoalar quyi ligaga tushib ketishadi.
SHamollab qolgani bois, Dostonbek Tursunov oxirgi o'yinda jamoasiga yordam bera olmadi. Klub rahbariyati ikkinchi davrada jamoa oldiga qo'yilgan vazifa bajarilganidan mamnun. Tursunov mazkur klub bilan iyun oyi oxiriga qadar shartnoma tuzgan edi va u tez orada erkin agentga aylanadi.
"Sog'ligimdagi kichik muammo tufayli so'nggi turda maydonga tusha olmadim, jamoa g'alaba qozonib ligada jon saqlab qolganidan barchamiz xursandmiz. Oldimizga qo'yilgan vazifani bajardik. O'zim ham o'yin amaliyotiga ega bo'ldim va sport formamni yaxshi darajaga olib chiqa oldim deb o'ylayman. Ayni paytda Eronning o'zidan 2-3 ta klubdan qiziqish mavjud. Biroz dam olib, keyin variantlarni o'rganib chiqamiz",- dedi Dostonbek Tursunov championat.asia saytiga.
Bosh sahifaga
386