Yangi mavsumga jamoani tayyorlagan No'mon Hasanov istefoga chiqarildi va uning o'rniga Viktor Jalilov bosh murabbiy etib tayinlandi. Birinchi turdan keyinoq murabbiyning ishdan olinishi ko'pchilik qatori bizni ham taajjubga soldi. Ushbu holatga nima sabab bo'lgani aniq emas. Biz esa vaziyatga baho berish maqsadida ekspert fikriga yuzlandik. Bunda o'z vaqtida "Navbahor", "Neftchi"dagi o'yinlari bilan tanilgan sobiq futbolchi Sanjar Asqaraliev mazkur jarayonlarga o'z munosabatini bildirib o'tdi.
"Birinchi turdanoq murabbiyni o'zgarishi chempionatimizda kam kuzatiladigan holat hisoblanadi. Deyarli yuz bermaydi. SHaxsiy fikrimcha, murabbiy o'zgarishini mavsum oldidan amalga oshirish yoki No'mon Hasanov biroz vaqt berish kerak edi.
Viktor Jalilovni oldinda qiyin ishlar kutmoqda. Birinchidan jamoani Viktor Romanovich shakllantirmagan, futbolchilarni u tanlamagan. SHu bois birdaniga katta o'zgarishlarga qo'la ura olmaydi. Ikkinchidan murabbiy bor futbolchilar bilan oldindagi o'yinlarga tayyorgarlik ko'rishga majbur. Bu natija beradimi yo'qmi buni vaqt ko'rsatadi. Eshitishimga qaraganda serbiyalik futbolchilar ham jamoani tark etish arafasida. Ushbu mutaxassisdan ko'p narsa o'rganish mumkin. Yana qaytaraman oldindagi bahslarda katta o'zgarishlar bo'lmaydi.
Viktor Romanovich birinchi davrani qo'l ostidagi futbolchilar bilan o'tkazib, yozgi transferlar oynasi vaqtida o'zi istagan o'yinchilarni jalb qilishi mumkin. Murabbiylik postini mavsum avvalida yoki joriy mavsum yakunlangach berish kerak edi, deb o'ylayman.
Ko'pchilik katta natijalar, o'sha chempionlikni kutayotgani tabiiy. To'g'ri, hozirda futbol umuman boshqa, o'zgargan. Lekin murabbiy shu futbolni ichida yurdi, chetga chiqib ketgani yo'q. Baribir vaqt o'tgani sari jamoada o'zgarishlarni qiladi",- deydi Sanjar Asqaraliev.
Bosh sahifaga
310