Kecha Qirgulidagi "Neftchi" SK stadionida vodiyning ikki etakchi klublari "Neftchi" hamda "Andijon" o'rtasida o'rtoqlik bellashuvi bo'lib o'tdi.
Aytib o'tish joizki, ushbu o'yinda har ikkala jamoada bir qator etakchi futbolchilar qatnashmadi. SHuning uchun murabbiylar zaxirada qolib ketayotgan ko'plab futbolchilarga imkoniyat berishga qaror qildilar. Uchrashuv esa "Neftchi"ning hujumlari bilan boshlanishiga qaramay o'yindagi hisobni andijonliklar ochishga muvaffaq bo'lishdi. Qanotdan oshirilgan uzatmaga birinchi bo'lib etib kelgan Rustam Turmurodov boshi bilan aniq zarba yo'llab mehmonlarni oldinga olib chiqdi. Keyinchalik tashabbusni qo'llariga olgan farg'onaliklar har qancha urinishmasin tanaffusga jamoalar 0:1 hisobi bilan yo'l olishdi.
Ikkinchi bo'limda "Neftchi" murabbiylari o'zgarishlarni amalga oshirdi va zaxiradan maydonga tushgan Anvarjon G'ofurov 70-daqiqada jarima maydonchasi ichiga havodan oshirilgan to'pni boshi bilan darvozaga yo'lladi va hisobni tenglashtirdi 1:1. Urilgan goldan keyin ham "buyuk chinorlar" bosimni kamaytirishmadi va bu urinishlar o'z mevasini berdi. 86-daqiqada Bilolxon Toshmirzaevning bergan kuchli zarbasini mehmonlar posboni qaytarishga erishdi, lekin qaytgan to'pni Sanjar Qodirqulov darvoza to'riga joylab qo'ydi 2:1.
Qolgan daqiqalarda har ikki jamoa qanchalik urinmasin, boshqa gol urish hech kimga nasib qilmadi.
"Neftchi" - "Andijon" 2:1
Gollar: Anvarjon G'ofurov (70), Sanjar Qodirqulov (86) — Rustam Turdimurodov (5)
Bosh sahifaga
142